अवैध सुनसहित त्रिभुवन अन्तर्राष्ट्रिय विमानस्थलमा तीनजना पक्राउ
काठमाडौं, माघ २० । प्रहरी टोलीले त्रिभुवन अन्तर्राष्ट्रिय विमानस्थलमा एक किलो अवैध सुनसहित तीन जनालाई पक्राउ गरेका छन् । प्रहरीका अनुसार उनीहरुलाई त्यहाँको आगमन कक्षमा १ करोड रुपैयाँ बराबरको सुन र आइफोनका सहित पक्राउ गरिएको हो ।
विमानस्थलमा रहेको प्रहरी टोलीबाट पक्राउमा परेका तीनजना युएईबाट आएका गौर नगरपालिका– १० रौतहटका ३२ वर्षीय सुनीलकुमार साह, मनहरी–७ मकवानपुरका नवराज परियार र भोटेकोसी –३, सिन्धुपाल्चोकका ३९ वर्षीय दावा छिरिङ शेर्पा हुन् । उनीहरूको साथबाट ४ थान आइफोन सहित १ केजी १ सय ५५ ग्राम सुन बरामद भएको प्रहरीले जानकारी दिएका छन् । पक्राउ परेकामध्ये शेर्पाले मलद्वारमा लुकाएर ल्याएको १ केजी १ सय ५५ ग्राम सुन बरामद भएको छ । उक्त सुनको मूल्य ८३ लाख ३८ हजार २ सय ४७ रुपैयाँ पर्छ । प्रहरीका अनुसार साहबाट ६ लाख ४० हजार मूल्य बराबरका ४ थान आइफोन, ३ लाख ८५ हजार २ सय २५ रुपैयाँ बराबरका बेरुवा औंठी र सिक्री बरामद भएको छ । परियारको साथबाट एक लाख ६० हजार रुपैयाँ बराबरको एउटा आइफोन र ३ लाख ९५ हजार २ सय २५ रुपैयाँ बराबरका सुनका औंठी र सिक्री बरामद भएको प्रहरीले जनाएका छन् ।
प्रहरीका अनुसार साह र परियार युएईबाट हिमालय एयरलाइन्स तथा शेर्पा सारजहाँबाट एयर अरेबियामार्फत बिहीबार त्रिभुवन विमानस्थल ओर्लिएका थिए ।
पक्राउ परेका तीनै जनालाई बरामद सामानसहित विमानस्थल भन्सार कार्यालयको जिम्मा लगाइएको छ ।