माघ २८, काठमाडैं । आईसीसी टी–२० विश्वकप क्रिकेटका लागि ग्लोबल छनोट खेल्न ओमान पुगेका नेपाली क्रिकेट टोलीले आज चारदेशीय टी–२० सिरिजको पहिलो खेल खेल्दैछन् । नेपाल र ओमानबीचको खेल नेपाली समय अनुसार अपरान्ह ३ः४५ बजेबाट अल अमरेत स्टेडियममा सुरू हुनेछ । यसअघि २०१९ मा खेल्दा ओमानसँग नेपाल ६ विकेटले पराजित भएको थियो । यही सिरिजको दोस्रो खेलमा नेपालले शनिबार युएई र सोमबार आयरल्यान्डसँग खेल्नेछ । यो सिरिजलगत्तै नेपालले विश्वकप क्वालिफायर खेल्नेछ ।नेपालले सन् २०१४ को आइसिसी टी–२० विश्वकप खेलेको थियो । सन् २०१३ मा भएको छनोट पार गरेर पहिलो पटक विश्वकप खेलेपछि नेपालमा क्रिकेटको उचाइ ह्वात्तै बढेको थियो । यसै साता ओमान प्रस्थान गर्ने नेपालले यसपटक विश्वकपमा छनोट हुने लक्ष्य लिएको छ ।   कप्तानको जिम्मेवारी पाएका सन्दीप लामिछानेले यसपटकको विश्वकपमा छनोट हुनका लागि नेपाल तयार रहेको प्रतिक्रिया दिएका छन् । उनले आफ्नो मात्र नभइ सारा नेपालीको इच्छा नेपालले विश्वकप खेलेको हेर्ने भएको बताएका छन्।दोस्रो पटक नेपालको प्रशिक्षक नियुक्त भएर अघिल्लो महिना नेपाल आएका पुबुदु दसानायाकेले पनि यसपटक नेपालका लागि विश्वकपमा छनोट हुने ठूलो अवसर रहेको बताएका छन् । विश्वकप छनोटअघि टी–२० सिरिज खेल्दा नेपाललाई फाइदा हुने कप्तान सन्दीप र प्रशिक्षक पुबुदुको भनाइ छ ।