फागुन ६, काठमाडौँ । सन्तानको रहर पुगेका दम्पतिको लागि सिरहामा सञ्चालित निःशुल्क परिवार नियोजन (बध्याकरण) शिविरमा पाँच सय ८१ जनाको बध्याकरण हुँदा एक जना पनि पुरुष परेनन् । सिरहाको भलुवाही, औरही गापा , भगवानपुर गापा, धनथढीमाई नपा, गोलबजार नपा, मिर्चैया नपा र कर्जन्हा नपा सहित ६ ठाउँमा आयोजित निःशुल्क बध्याकरण शिविरमा पाँच सय ८१ जना महिलाको मिनिल्याप सेवा लिएको हो । भलुवाहीमा ९४, औरही गापामा ५१ , भगवानपुर गापा एक सय ३, धनथढीमाई नपा ८६, गोलबजार नपा ८६, मिर्चैया नपामा एक सय १२ र कर्जन्हा नपामा ४८ जना महिलाको मिनिल्याप गरिएको जिल्ला स्वास्थ्य कार्यालय सिरहाका भेक्टर कन्ट्रोलर अधिकृत अन्देश्वर प्रसाद चौधरीले जानकारी दिए । शिविरमा पुरुषले भने सेवा लिएनन् । सामाजिक रितिरिवाज र सहि काउान्सिलिङ नहुँदा पुरुषहरुले बध्याकरण नगराएको हुन सक्ने अधिकृत चौधरीले बताए । उनले सिरहामा पछिल्लो तीन वर्षका एक जना पुरुषले पनि बध्याकरण नगरेको जनाए । गत वर्ष पनि ७ सय २३ जनाको मध्याकरण हुँदा एक जना पनि पुरुषले सेवा नलिएको उनले बताए । ७६ सालमा भएको शिविरमा एक जना पुरुषले बध्याकरण गराएको भएपनि उनी जिल्ला बाहिरका कर्मचारी थिए । यता आम पुरुषहरु भने बध्याकरण गर्दा यौन शाक्ति कमजोर हुने त्रासका कारण बध्याकरण गर्न अनिच्छा देखाएको बताउँछन् ।