२२ फागुन, काठमाडौँ । सिरहाः लहान प्रहरीले दुई जनालाई अवैध गर्भपतन मुद्दामा पक्राउ गरेर कारबाही चलाएको छ। लहान नगरपालिका–३ मा राजदेवी मेडिकल नामक अवैध क्लिनिक सञ्चालन गरी गर्भपतन गराउँदै आएका ३८ वर्षीय उमेश चौधरी र उनकी पत्नी ३० वर्षीया राजकुमारी चौधरीलाई जिल्ला अदालत सिरहाबाट म्याद थप गरी कारबाहीका लागि लहान प्रहरी कार्यालयमा राखिएको छ। लहान प्रहरी कार्यालयका प्रमुख डिएसपी तपन दाहालले सिरहाको लक्ष्मीपुरपतारी गाउँपालिका–२ की २५ वर्षीयको गर्भपतन गराइरहेका बेला चौधरी दम्पतीलाई प्रहरीले पक्राउ गरेको बताए। लहानकै एक भिडियो एक्सरे सेन्टरले भ्रूण छुट्याएर ती महिलालाई गर्भपतनका लागि चौधरीको क्लिनिकमा पठाएको बताइएको छ। प्रहरीले गर्भपतन गराउने महिलालाई नियन्त्रणमा लिएको थियो। बयानपछि उनलाई छाडिएको छ। भ्रूण छुट्याउने भिडियो एक्सरे सेन्टरका सञ्चालक भने पक्राउ परेका छैनन्। उनले भिडियो एक्सरे गराउने स्थानको सम्पूर्ण विवरण र प्रमाण प्रहरीलाई दिएकी छन्। चौधरीद्वयले सञ्चालन गरेको क्लिनिक पनि गैरकानुनी रहेको प्रहरी अनुसन्धानबाट खुलेको छ। उनीहरूले क्लिनिकमै सञ्चालन गरेको औषधि पसल पनि कानुनविपरीत रहेको बताइएको छ। चौधरीद्वयलाई कानुनले बिरामी जाँचेर औषधि लेख्ने अधिकार दिँदैन। केही समयअघि लहान–३ अस्पताल चोकस्थित खेतमा सालनालसहित शिशुको शव फेला पर्‍यो। खेतमा फालिएको नवजात शिशु (छोरा) को शव परीक्षणका लागि राउ स्मारक अस्पताल लहानमा पुर्‍याइयो। परीक्षणका क्रममा चिकित्सकले उक्त शव १८ देखि २० साताको भएको खुलाए। प्रहरीले सूचनाका आधारमा एक युवती र उनीसँगै आएकी महिलालाई अस्पताल चोकबाटै नियन्त्रणमा लियो। ती युवतीलाई राउ स्मारक अस्पताल लहानमा स्वास्थ्य परीक्षण गराउँदा उनले गर्भपतन गराएको खुल्यो। त्यसपछि प्रहरीले ती युवतीलाई जिल्ला अदालत सिरहाबाट अवैध गर्भपतन मुद्दामा म्याद थप गरी कारबाही अघि बढाएको छ। लहान नगरपालिका–७ मारवाडी सेवा समिति नजिकको नहरमा सालनालसहित फालिएको शिशु (छोरी) को शव कुकुरले फेला पारेपछि स्थानीयले प्रहरीलाई खबर गरे। प्रहरीले शव परीक्षण गर्‍यो तर उक्त घटनामा संलग्नलाई पहिचान गरी कानुनी दायरामा ल्याउन सकेन। भ्रूण हत्या यहाँका लागि नौलो भने होइन। पछिल्लो समय अवैध गर्भपतन गराउने अखडाका रूपमा लहानको पहिचान बन्दै गएको छ। यहाँ अवैध गर्भपतन गराउने स्वास्थ्य केन्द्रको जगजगी छ। नियामक निकायले गैरकानुनी धन्दामा संलग्नलाई कानुनी दायरामा ल्याउन नसक्दा गैरकानुनी गर्भपतन (भ्रूण हत्या) मौलाउँदै गएको स्थानीय बताउँछन्। पछिल्लो समय लहान बजारमा बग्रेल्ती खुलेका अल्ट्रासाउन्ड सेन्टर र पोलिक्लिनिक, मेडिकेयर सेन्टर, औषधि पसलमा लिंग पहिचान गरेर भ्रूण हत्या गर्ने क्रम बढेको छ। निजी क्लिनिकमा काम गर्ने डाक्टर र तिनका सहयोगी मोटो रकम लिएर भ्रूण हत्यामा संलग्न भएको पाइएको छ।