१३ बैशाख, काठमाडौँ । इलन मस्कले संसारभरि सामान्य देखि विशिष्ट व्यक्तिहरुले बारम्बार चलाउने प्रभावशाली सामाजिक सञ्जाल, ट्विटर किन्नका लागि सम्झौता गरेका छन् । उनी विश्वका सबैभन्दा धनी व्यक्ति हुन । उनले ५४.२० डलर प्रतिसेयर मूल्यमा कुल ४४ बिलियन डलर (अहिलको विनिमय दरअनुसार ५३ खर्ब ६८ अर्ब) तिरेर ट्विटर किन्ने भएका हुन् । मस्कका अनुसार सामाजिक सञ्जालहरूले आपत्तीजनक नै भए पनि कानुनी रूपमा गलत नहुने कमेन्टहरू हटाउनु हुँदैन । ट्विटरले हाल उत्पीडन, दुर्व्यवहार र कसैलाई शारीरिक हानि गर्ने आशयका पोस्ट हटाउने गरेको छ । कोभिड–१९ सम्बन्धी गलत जानकारीमा पनि ट्विटरले प्रतिबन्ध लगाउने गरेको छ । मस्कले ट्विटरका यस्तै प्रावधान खुकुलो पार्लान् भनेर सामाजिक सञ्जाल विज्ञहरू चिन्ता व्यक्त गरिरहेका छन् । उत्पीडक, ट्रोल र दुर्व्यवहार गर्नेहरूलाई यसले सघाउने तिनको भनाइ छ । हरेक दिन २० करोडभन्दा बढी मानिसहरूले प्रयोग गर्ने माइक्रोब्लगिङ साइट, ट्विटर मस्कको हातमा परेपछि उनले अब यसलाई कस्तो आकार दिनेछन् भन्नेमा सबैको चासो छ । आफूलाई वाक्स्वतन्त्रताको कडा पक्षधर बताउने मस्कले ट्विटरको सम्पूर्ण सामर्थ्य उजागर हुन बाँकी रहेको बताउँदै आएका थिए । उनले अभिव्यक्ति स्वतन्त्रताको नाममा ट्विटरका विधान खुकुलो पार्ने अनुमान गरिएको छ ।