२३ बैशाख काठमाडौँ । वैशाख ३० गते शुक्रबार हुन गइरहेको स्थानीय तह निर्वाचन मतदानको दिन सवारी साधन चलाउन नपाइने भएको छ। स्थानीय तहको निर्वाचनका दिन सवारी आवागमन व्यवस्थापन गर्नका लागि निर्वाचन आयोगले मापदण्ड जारी गरेको छ ।निर्वाचन आयोगका अनुसार विना पासका सवारी साधनहरु चलाउन नदिने र विशेष कामले सञ्चालन गर्नुपर्ने सवारीले अनिवार्य रूपमा जिल्ला निर्वाचन अधिकृतको कार्यालयबाट पास लिनुपर्ने छ।आयोगको बिहीबार बसेको बैठकले ‘स्थानीय तह सदस्य निर्वाचन, २०७९ को मतदानको दिनको सवारी आवागमन व्यवस्थापन सम्बन्धी मापदण्ड, २०७९’लाई पारित गरेको हो । पारित मापदण्डअनुसार उम्मेदवार वा उम्मेदवारको निर्वाचन प्रतिनिधिले मतदानको दिन सवारीसाधन चलाउनका लागि सम्बन्धित जिल्लाको निर्वाचन अधिकृतसमक्ष निवेदन दिनुपर्नेछ । त्यसपश्चात निर्वाचन अधिकृतले उम्मेदवारको विवरण यकिन गरी त्यसै निवेदनमा सिफारिस गर्नुपर्नेछ ।   उम्मेदवारबाहेक अन्य निकाय वा संस्थाले सम्बन्धित निकाय वा संस्थाको आधिकारिक लेटर प्याडमा सिफारिस दिने अधिकारीको सिफारिस लिइ त्यसैबमोजिम साधनको अनुमतिपत्र जारी गर्ने निकाय वा अधिकारीसमक्ष पत्र पेश गर्नुपर्नेछ । जसमा सवारी साधनको नम्बर, किसिम, सवारी साधन प्रयोगकर्ताको नामसमेत उल्लेख गर्नुपर्नेछ । आयोगका अनुसार एम्बुलेन्स, खानेपानीको ट्याङ्कर, दमकल, दूरसञ्चार शेवा, शव बाहन, अस्पताल सेवा तथा विद्युत सेवा जस्ता अत्याश्यक सेवा र नम्बर प्लेटमा सिडी उल्लेख भएको कुटनीतिक नियोगको सवारी साधनले अनुमती पत्र लिनुपर्दैन। सवारीसाधनको अनुमतिका लागि वैशाख २८ गतेसम्ममा निवेदन दिइसक्नुपर्नेछ ।