२९ वैशाख, काठमाडौैँ । शीर्ष चारको दौडमा रहेको लन्डन क्लब चेल्सीले इंग्लिस प्रिमियर लिगमा सानदार जित निकालेको छ । चेल्सीले १० खेलाडीमा समेटिएको लिड्स युनाइटेडलाई उसकै मैदानमा ३–० ले पराजित गर्दै शानदार जित निकालेको हो ।   चेल्सीको जितमा मासन माउन्ट, क्रिस्टियन पुलिसिस र रोमेलु लुकाकुले गोल गरे । चेल्सीले पहिलो हाफमा एक तथा दोस्रो हाफमा दुई गोल गर्न सफल भएको थियो । एलान्ड रोडमा बुधबार राति भएको खेलको चौथो मिनेटमा मासन माउन्टले गोल गर्दै चेल्सीलाई सुरुआती अग्रता दिलाए। उनले रिस जेम्सको पासमा गोल गर्न सफल भएका थिए । २४औं मिनेटमा घरेलु टोली लिड्स १० खेलाडीमा समेटियो। ड्यानियल जेम्स सिधै रातो कार्ड खाँदै मैदानबाट बाहिरिए । क्रिस्टियन पुलिसिसले ५५औं मिनेटमा गोल गर्दै चेल्सीको अग्रता दोब्बर पारे । उनले मासन माउन्टको पासमा गोल गर्न सफल भएका थिए । ८३औं मिनेटमा रोमेलु लुकाकुले हाकिम जियाचको पासमा गोल गर्दै चेल्सीको सहज जित पक्का गरे । यो जितसँगै तेस्रो स्थानमा रहेको चेल्सीको ३६ खेलबाट ७० अंक पुगेको छ । एक खेल कम खेलेको आर्सनलको ६६ अंक रहेको छ । पराजित लिड्स ३४ अंक जोडेर १८औं स्थानमा रहेको छ । शीर्ष स्थानमा रहेको म्यान्चेष्टर सिटीको ८९ अंक छ भने दोस्रो स्थानमा रहेको लिभरपुलको ३६ खेलबाट ८६ अंक पुगेको छ।