२ ज्येष्ठ, काठमाडौँ । नेपाली राष्ट्रिय महिला क्रिकेट टिमले आज (सोमबार) पहिलो पटक घरेलु मैदानमा टी–२० अन्तरराष्ट्रिय शृंखला खेल्दैछ । उक्त खेल युगान्डाविरूद्ध दिउँसो १ बजेदेखि कीर्तिपुरस्थित टियु क्रिकेट मैदानमा हुँदै छ । कीर्तिपुरस्थित टियु क्रिकेट मैदानमा हुने पाँच खेलको श्रृंखला लागि युगान्डा टिम हिजो ९आइतवार० नेपालमा आइसकेका छन् । नेपाली टोलीले सिरिजका लागि १६ सदस्यीय अन्तिम टोलीको घोषणा गरिसकेको छ । यसपटक टोलीमा दुई नयाँ अनुहार समावेश हुँदा अनुभवी स्पिनर करुणा भण्डारी भने टोलीमा रहने छैनन् । उनको स्थानमा यु–१९ प्रतियोगितामा राम्रो प्रदर्शन गरेकी लेग स्पिनर हिरणमयी रोय पहिलो पटकमै अन्तिम टोलीमा समावेश गरिएको छ । बागमती प्रदेशको कप्तानी गर्दै आएकी तीव्र गतिकी बलर अस्मिना बन्द प्रशिक्षणमा रहे पनि पहिलो पटक टोेलीमा समावेश गरिएको छ। जगत टमटाको प्रशिक्षणमा रहेको नेपाली टिममा कप्तानी रुविना क्षेत्री, उपकप्तान इन्दु वर्मा, सिता राना मगर, ज्योति पाण्डे, काजल श्रेष्ठ, कविता कुँवर, अप्सरी बेगम, कविता जोशी, डोली भट्ट, अस्मिना कर्माचार्य, संगीता राई, सबनम राई, रोमा थापा, सरिता राना मगर, हिरणमयी रोय, बिन्दु रावल खेलाडीहरू रहनेछन् । यसअघि नेपालले पहिलो अन्तर्राष्ट्रिय टी–२० शृंखला कतारविरुद्ध गत मंसिरमा खेलेको थियो । कतार भ्रमण क्रममा खेलिएको शृंखला नेपालले ‘क्लिन स्विप’ गरेको थियो । हाल नेपाल आईसीसी टी–२० वरियतामा १६ औं स्थानमा छ भने युगान्डा १९ औं स्थानमा छ । नेपाल र युगान्डाबीच ३ जेठमा दोस्रो, ५ जेठमा तेस्रो, ६ जेठमा चौथो र अन्तिम तथा पाँचौ ७ जेठमा हुनेछ । दर्शकलाई खेल हेर्न मैदान प्रवेश निशुल्क समेत गरिएको छ ।