पूर्वाधार एम्बुलेन्स : जसले दैनिक सात ठाउँका खाल्डाखुल्डी पुर्छ
असार १, काठमाडौं । काठमाडौं महानगरपालिकाले सञ्चालनमा ल्याएको पूर्वाधार एम्बुलेन्सले दैनिक सात ठाउँका खाल्डाखुल्डी पुर्ने गरेको छ । केही दिनअघि मात्रै सञ्चालनमा ल्याइएको एम्बुलेन्सले आफैँ अनुगमन गरेर समस्या समाधान गर्न थालेको महानगर सहरी पूर्वाधार विकास विभागका प्रमुख रामबहादुर थापाले बताए ।
विभागका अनुसार महानगरले दुईवटा पूर्वाधार एम्बुलेन्स स्ट्यान्डबाई राखिएको छ । तर, तत्काल धेरै गुनासा र समस्याहरू नआउँदा एउटा एम्बुलेन्स सञ्चालनमा ल्याइएको छ । “आज पनि बुद्धनगरतिर एम्बुलेन्स गएको छ । कर्मचारी, जनप्रतिनिधि, महानगरबासीले गरेको गुनासोका आधारमा एम्बुलेन्स जान्छ । आवश्यकता अनुसार आएको सूचनालाई पछ्याउने काम भइरहेको छ,” थापाले भने, “तत्काल समस्या समाधान नगर्दा पनि केही नहुने समस्याहरूलाई पनि प्राथमिकतामा राख्छौँ । बाटोमा सवारी दुर्घटना, मान्छे आवतजावतमा समस्या छ भने तत्काल समाधान गर्छौं ।”
थापाका अनुसार दैनिक सात ठाउँमा पुगेर खाल्डाखुल्डी पुर्ने काम एम्बुलेन्सले गरिरहेको छ । यसका लागि पूर्वाधार एम्बुलेन्ससहित इन्जिनियर र काम गर्ने मानिसहरू पुगेर तत्काल खाल्डाखुल्डी पुर्ने काम गर्छन् । महानगरमा बसेको पहिलो कार्यपालिका बैठकमा मेयर बालेनले भौतिक पूर्वाधार एम्बुलेन्स सञ्चालन गर्ने प्रस्ताव राखेका थिए । उक्त प्रस्तावलाई कार्यपालिका बैठकले अनुमोदन गरेको थियो ।