असार १, काठमाडौं । सत्तारूढ दल नेपाली कांग्रेसका महिला सांसदहरूले ‘कुमारी आमा’ निहारिका राजपूतको न्यायका लागि माग गरेका छन् । बुधबार प्रतिनिधिसभा बैठकमा बोल्दै कांग्रेस सचेतक पुष्पा भुसाल र सांसद डा। डिला संग्रौला पन्तले निहारिका राजपूतलाई न्याय दिन माग गरेका हुन् । उनीहरूले बलात्कार मुद्दामा हदम्याद हटाउन पनि माग गरे । “निहारिका घटनाले राज्यको दायित्व बढाएको छ, छिटो न्याय दिन के कस्तो रणनीति अपनाएको छ, बलात्कार घटाउन र अपराधीलाई निरुत्साहित गर्न बलात्कारसम्बन्धी हदम्याद घटाउन जरुरी छ,” भुसालले भनिन् । सांसद् संग्रौलाले ढिलो न्याय दिनु भनेको न्याय नदिनु भएको भन्दै राजपूतलाई न्याय दिन आग्रह गरिन् । “कुमारी आमा बच्चा च्यापेर न्याय मागिरहेकी छन्, उनले आफू १७ वर्षमा बलात्कृत भएको भनेकी छन्,” संग्रौलाले भनिन्, “न्याय ढिला हुनु भनेको न्याय नपाउनु हो । न्यायलाई छिटो बनाउन आग्रह गर्दछु । कुमारी आमालाई न्यायका लागि अपिल गर्दछु ।” प्रमुख प्रतिपक्ष दल नेकपा (एमाले) की सांसद थममाया थापाले पनि निहारिकालाई न्याय दिन सरकारसँग माग गरेकी छन् । बुधबार प्रतिनिधिसभा बैठकमा बोल्दै उनले शिशुलाई दूध चुसाउँदै अनशन बस्ने कुरा लाजमर्दो भएको भन्दै न्यायको माग गरेकी हुन् । ०७६ साल कात्तिकमा १७ वर्षकी हुँदा जनकपुरका शिवराज श्रेष्ठले नशालु पदार्थ खुवाएर बलात्कार गरेको भन्दै निहारिका अनशनरत छिन् । बलात्कारपछि जन्मिएको बच्चा २१ महिनाका हुँदा पनि न्याय नपाएको निहारिकाको भनाइ छ । आज अनशनको छैटौँ दिनसम्म आइपुग्दा निहारिकाको स्वाथ्य कमजोर बन्दै गएको छ । निहारिकाको मुद्दामा धनुषा जिल्ला अदालतले ०७८ माघ २४ गते श्रेष्ठको पक्षमा फैसला गरेको थियो ।