असार २, काठमाडौँ । मेलम्ची खानेपानी आयोजना सुन्दरीजलमा विद्युत सर्ट भएर एक मजदुरको मृत्यु भएको छ । ३ वर्षदेखि काम गर्दै आएका गोकर्णेश्वर नगरपालिका वडा नं. १ निवासी २५ वर्षिय सोनाम तामाङको जेठ ३१ गते  ज्यान गएको परिवारले बताएको छ । कम्पनीको लापरवाहीका कारण मजदुरको ज्यान गुमाएको भन्दै आफन्ताहरुले क्षतिपूर्तिको माग सहित ध्यानाकर्षण गरेका छन् ।  मृतक तामाङको शव  ३ दिनदेखि शिक्षण अस्पताल महाराजगञ्जमा राखिएको छ । मेलम्ची खानेपानी आयोजनाको चरम लापरवाहीका कारण पटक–पकट मजदुरले ज्यान गुमाउनुपर्ने बाध्यता रहेको त्यहाँका स्थानीयहरुको भनाई छ । जोखिम मोलेर काम गर्नुपर्ने बाध्यता रहेको त्यहाँ मजदुरहरुको गुणासो छ । बुट समेत नदिई सामान्य चप्पाल मात्र लाएर काम गर्नुपर्ने बाध्यता रहेको त्यहाँको मजदुरहरुको भनाई छ । विद्युत प्रवाहलाई सुरक्षा नअपाउँदा पटक–पटक त्यस्तो घटनाहरु घटिरहेको गोकर्णेश्वर वडा १ का पूर्व अध्यक्ष राम मानन्धरले बताए । घटना घटेपछि आफू पनि पुगेको र निर्वाचित जनप्रतिनिधिहरु नभएपछि घटना छानविन प्रक्रिया अगाडी नबढाएको उनले बताए । मानन्धरले खानेपानी आयोजनाले मृतकका परिवारलाई उचित क्षतिपूर्ति दिनुपर्ने र स्थानीयहरुलाई रोजगार प्रवन्धसंगै सुरक्षाको ग्यारेण्टी गर्नुपर्ने बताए । ४ महिनादेखि नै सुरुङ्ग अगाडी बिजुलीको पोलमा विद्युत सर्ट भईरहे पनि वास्ता नगरी मजदुरलाई काम गर्न लगाईरहेको अन्य कामदारहरु बताउँछन् । मृतक सोनाम तामाङको श्रीमति र ३ वर्षिय एक छोरी छिन् ।