असार १२, काठमाडौं । काठमाडौंको नेपालटारस्थित डेरामा मृत भेटिएकी दोहोरी गायिका दिलमाया सुनारको मोबाइल फेला परेको छैन । प्रहरीका अनुसार शनिबार बिहान पौने ११ बजे उनी कोठामै मृतावस्थामा फेलापरेकी थिइन् । सुर्खेत घर भएकी उनले शुक्रबार राति ‘काठमाडौंमा आफूलाई बाँच्न गाह्रो भएको’ भन्दै सामाजिक सञ्जालमा ‘सुसाइड नोट’ आशयको स्टाटस पनि लेखेकी थिइन् । घटनाबारे प्रहरी अनुसन्धान जारी छ । अनुसन्धानमा संलग्न एक प्रहरी अधिकारीका अनुसार घटना शंकास्पद छ । उनले भने, “मृतकको मोबाइल भेटिएको छैन । स्टाटस पनि लेखिएको छ । तर, मोबाइल नभेटिँदा शंका गर्ने ठाउँ छ । मोबाइल खोजिरहेका छौँ । एकजनालाई नियन्त्रणमा लिएका छौँ । अहिले सबै भन्न मिल्ने अवस्था छैन ।” मृत्युको घटना अनुसन्धानका क्रममा प्रहरीले सूर्य श्रेष्ठलाई पक्राउ गरेको छ । प्रहरीका अनुसार शूर्य शनिबार बिहानै मृतक सुनारको कोठामा पुगेको पाइएको छ । गायिका दिलमायाले ख्यातिप्राप्त लोकगायक राजु परियारसँग मिलेर केही चर्चित गीत गाएकी छन् । उनी लाइभ दोहोरीगीतका कारण पनि चर्चित थिइन् । राष्ट्रिय लोकदोहोरी गीत प्रतियोगितामा उत्कृष्ट घोषित भएकी दिलमाया विवाहित थिइन् । तर, पतिसँग सम्बन्धविच्छेदपछि उनी केही वर्षयता एक्लै बस्दै आएको खुलेको छ । उनका एक छोरा सुर्खेतमा बस्दै आएको बताइएको छ । शुक्रबार राति दिलमायाले फेसबुकमा स्टाटस लेख्दै आफूलाई बाँच्न गाह्रो भएको र आफ्नो मृत्युमा कसैलाई दोष नदिनु भनेकी थिइन् । प्रहरीले उनको हत्या वा आत्महत्या अहिले नै भन्न नसकिने जनाएको छ ।