२३ असार, काठमाडौँ । सुर्खेतको वीरेन्द्रनगरमा जग्गाधनीलाई थाहै नदिएर अर्कैको नाममा जग्गा नामसारी गर्ने १३ जनालाई सुर्खेत जिल्ला अदालतले दोषी ठहर गरेको छ । अदालतका न्यायाधीश डा.राजेन्द्रकुमार आचार्यको एकल इजलासले मालपोत कार्यालय सुर्खेतका चार जना कर्मचारीसहित १३ जनालाई किर्ते तथा ठगी गरेको कसूर ठहर गर्नु भएको हो । वीरेन्द्रनगरका सौगात रावतको जग्गा थाहै नदिई अर्कैको नाममा विक्री गर्न खोज्ने ठाकुर, पुरी र बुढालाई जिल्ला अदालत धरौटीमा छाडेको थियो भने उच्च अदालत सुर्खेतले जिल्लाको आदेश उल्ट्याउँदै गत कात्तिकमा पुर्पक्षका लागि थुनामा पठाएको थियो । रावतको नाममा दर्ता भएको वीरेन्द्रनगर नगरपालिका १२ साबिक जर्बुटा गाविस ३ क मा रहेको कित्ता नं ३१११ को जग्गा २०७७ असार १० पछि ६ कित्तामा अर्कैको नाममा नामसारी गरेको खुलेको थियो । मालपोत कार्यालयका कर्मचारी विश्वरुप साउद, गणेश विक, कृष्णबहादुर थापा, दिपेन्द्र श्रेष्ठ र तीर्थराज महताराले किर्ते गरेको ठहर भएको अदालतका स्रेस्तेदार ठाकुरप्रसाद पौडेलले जानकारी दिनुभयो । उहाँका अनुसार वीरेन्द्रनगर १२ का रामकुमार दर्लामी, उत्तम अधिकारी र सुनिता रानालाई पनि अदालतले किर्ते कसुरदार ठहर गरेको छ । गएको पुस २९ गते जग्गाको नक्सा निकाल्ने क्रममा रावतका नामको कित्ता नम्बर नभेटिएपछि जग्गा अर्कैको नाममा नामसारी भएको तथ्य बाहिर आएको हो । ठाकुरसहितले सहवीर कार्कीका नाममा राजीनामा लिखत पास गरी लिएपछि मालपोतका कर्मचारीसहित १९ जना जग्गा प्रकरणमा मुछिनु भएको थियो ।