६ साउन, काठमाडौँ । द्रौपदी मुर्मू भारतीय राष्ट्रपतिमा निर्वाचित भएकी छन् । उनले प्रतिस्पर्धी यशवन्त सिन्हालाई पराजित गरेकी हुन् । भारतीय राष्ट्रपतीय निर्वाचनमा इलेक्टोरल कलेजमा कुल १० लाख ८६ हजार ४३१ मत हुन्छ । चुनावमा आधाभन्दा बढी मत ल्याउने उम्मेदवार विजयी हुन्छ । यस्तो अवस्थामा जितका लागि कम्तिमा ५ लाख ४३ हजार २१६ मत चाहिन्छ । समाचार एजेन्सी एएनआईले राज्यसभाका महासचिव पीसी मोदीको हवाला दिँदै तेस्रो राउन्ड सकिँदासम्म मुर्मूले ५ लाख ७७ हजार ७७७ मत पाएको उल्लेख गरेको छ । उनका प्रतिस्पर्धी सिन्हाले भने हालसम्म २ लाख ६१ हजार ०६२ मत पाएको जनाइएको छ । मुर्मू राष्ट्रपति भन्ने दोस्रो भारतीय महिला हुन् । उनी राष्ट्रपति बन्ने पहिलो आदिवासी हुन् । आफूलाई राष्ट्रपतिको उम्मेदवार बनाइने घोषणा हुँदै गर्दा मुर्मू ओडिसामा रहेको आफ्नो घरमा थिइन् । सन्थाल आदिवासी मुर्मूको जन्म भारतले स्वतन्त्रता पाएको ११ वर्षपछि अर्थात् २० जून १९५८ मा भएको थियो । मुर्मूले स्थानीय सञ्चारमाध्यमलाई आफूलाई राष्ट्रपतिको उम्मेदवारी बनाएको कुरा टेलिभिजनबाट थाहा पाएको बताएकी थिइन् । मुर्मू झारखण्डकी पहिलो महिलो तथा आदिवासी राज्यपाल हुन् । उनी पहिलोपटक सन् २०१५ मा राज्यपाल बनेकी थिइन् । उनी लगभग ६ वर्षसम्म राज्यपाल रहेकी थिइन् । भारतीय मिडियाका अनुसार सन् १९९७ मा वार्ड काउन्सलरबाट मुर्मूको राजनीतिक यात्रा सुरु भएको हो । राजनीतिक यात्राका क्रममा उनी बीजेपीको तर्फबाट दुई पटक विधायक चुनिएकी थिइन् । सन् २००० देखि २००४ सम्म उनी नवीन पटनायकको मन्त्रीमण्डलमा राज्यमन्त्री बनिन् । एजेन्सी