वैदेशिक रोजगारीको दुःखद् पाटोः १४ वर्षमा १० हजार नेपालीको मृत्यु
१ भदौँ, काठमाडौँ ।
वैदेशिक रोजगारीमा जाने क्रम दिन प्रतिदिन बढ्दै गइरहेको छ । दैनिक लगभग १ हजार ७०० भन्दा बढी नेपालीहरू वैदेशिक रोजगारीमा गइरहेको तथ्यांकमा उल्लेख छ ।
जति धेरै नेपाली वैदेशिक रोजगारीमा गइरहेका छन्, त्यति नै धेरै नेपालीको विदेशमा मृत्यु भइरहेको पनि देखिएको छ । वैदेशिक रोजगार विभागको तथ्यांक अनुसार १४ वर्षमा १० हजार ९३२ जना नेपालीले वैदेशिक रोजगारीको क्रममा ज्यान गुमाएका हुन् । २ हजार १२५ जना अंगभंग भएका छन् ।
आर्थिक वर्ष २०६५÷०६६ मा ७८ जना र त्यस्तै आर्थिक वर्ष २०७८÷०७९ मा १ हजार ४७९ जनाले ज्यान गुमाए । जसमा विभागको तथ्याङ्कअनुसार १ हजार ४३२ जना पुरूष र ४७ जना महिला रहेको थियो ।
यो १४ वर्षको बीचमा नेपालबाट ५० लाख नेपाली वैदेशिक रोजगारीमा गएका छन् । कोरोना महामारीका कारण आर्थिक वर्ष २०७७÷०७८ मा ७२ हजार मात्रै वैदेशिक रोजगारीमा गएका थिए । २०७५ देखि २०७७ सम्म वैदेशिक रोजगारीमा जानेको संख्या घटेको थियो ।
तर, गत आर्थिक वर्षमा भने अहिलेसम्मकै सबैभन्दा धेरै ६ लाख ३० हजार भन्दा बढी नेपाली वैदेशिक रोजगारीमा गएका थिए । वैदेशिक रोजगारीमा जानेमा गत आर्थिक वर्षमा महिलाको संख्या ५० हजारको हाराहारीमा पुगेको थियो । यो १४ वर्षको अवधिमा ८४ खर्ब ६६ अर्ब बराबरको रेमिट्यान्स भित्रिएको छ । गत आर्थिक वर्षमा मात्रै १० खर्ब ७ अर्ब ३१ करोड बराबरको रेमिट्यान्स भित्रिएको थियो ।