भाद्र ६, काठमाडौँ । नेपाल क्रिकेट संघ क्यानले केन्या जाने नेपाली राष्ट्रिय क्रिकेट टोलीलाई बिदाइ गरेको छ । क्यानले सोमबार कार्यक्रम गर्दै टोलीलाई बिदाइ गरेको हो । केन्या भ्रमणमा नेपालले पाँच टी(२० आई र तीन एकदिवशीय खेल खेल्नेछ । सन्दीप लामिछानेको कप्तानीमा १६ खेलाडीसहित २१ जनाको टोलि केन्या जाने छ । नवनियुक्त मुख्य प्रशिक्षक मनोज प्रभाकरले पनि यही भ्रमणबाट आफ्नो जिम्मेवारी सुरुवात गर्दैछन् । उनले केन्या जानुअघि राम्रो तयारी भएको बताए । उनले भने, ‘सबै युवा खेलाडीहरु प्रदर्शनका लागि तयार छन् । हामी राम्रो गर्नेछौं । राम्रो म्याच प्राक्टिस हुनेछ ।’ उनले नेपालको लक्ष्य टिमको रुपमा राम्रो प्रदर्शन गर्नु रहेको बताए । कप्तान सन्दीप लामिछानेले केन्या भ्रमण महत्वपूर्ण रहको बताए । उनले भने, ‘नयाँ खेलाडी र केहीको पुनरागमन छ । नयाँ प्रशिक्षकको प्रशिक्षणमा खेल्न उत्साहित छन् । अपेक्षा अनुसार नै नतिजा ल्याउनेछौं ।’ क्यान अध्यक्ष चतुरबहादुर चन्दले नोभेम्बरमा हुने लिग टु शृंखलालाई ध्यानमा राख्दै म्याच प्राक्टिस गर्नका लागि केन्या भ्रमण पठाएको बताए । उनले भने, ‘नेपालमा वर्षातका बेला म्याच खेल्न नपाइरहेको बेला केन्या जाँदैछौं । पाँच टी(२० खेल नेपालको लागि महत्वपूर्ण छ ।’ तलको टिमलाई जित्दा वरीयता सुधार्न धेरै अंक नपाए पनि यसले सहयोग पुग्ने उनले बताए । प्रशिक्षक प्रभाकरका लागि पनि खेलाडीलाई नजिकबाट चिन्ने मौका हुने चन्दले बताए । २०२४ को टी(२० विश्वकपका लागि अहिलेदेखि तयारी गर्नुपर्ने उनले बताए । कप्तान सन्दीप लामिछाने केन्याबाटै क्यारेबियन प्रिमियर लिग खेल्न वेष्ट ईन्डिज जानेछन् । सीपीएलमा उनी जमैका तल्हवाजबाट खेल्नेछन् । नेपाल टी(२० लिग समयमै भएमा नेपाल फर्कने उनले बताए । नेपाली टोलीमा अर्जुन साउद नयाँ अनुहारका रुपमा छन् ।