भदौ २५, पोखरा  । समाजवादी नेता एवम् जननायक वी.पी. कोइरालाको १०९ औँ जयन्तीका अवसरमा पोखरा कास्की जिल्लामा वी.पी. स्मृति पुस्तकालय र सूचना प्रविधि कक्षको उद्घाटन गरेको छ । नेपाली काँग्रेस गण्डकी प्रदेशले आयोजना गरेको सो कार्यक्रम शिक्षाविद प्राध्यापक केदार भक्त माथेमाको प्रमुख आतिथ्यता एवम् वी.पी. संग्राहलय सुन्दरीजलका संस्थापक अध्यक्ष परशुराम पोखरेलको विशेष आतिथ्यतामा सम्पन्न भएको छ । कार्यक्रममा बोल्ने अथिति वक्तहरुले पुस्तकालयको औचित्य र आवश्यकतालाई मध्यनजर गरी व्यवस्थापनमा लाग्न आग्रह गरेका छन् ।   प्रमुख अतिथि समेत रहेका प्राध्यापक माथेमाले वी.पीको नामबाट पुस्तकालय खोल्नु गर्वको विषय भएको जिकिर गरे । उनले नेपालमा पुस्तकालय पढ्ने संस्कार नै नभएको अवस्थामा विशाल व्यक्तित्वको विचार र सिद्धान्तबाट पुस्तकालय निर्माणले समाजलाई टेवा पुग्ने बताए । प्रा. माथेमाले वीपीलाई संघुरो दायरामा मात्र राखेर हेर्न नमिन्ले र उनी दक्षिण यशियकै बहु प्रतिभाशाली व्यक्तित्वको रुपमा चित्रण गर्नुपर्ने बताए । उनले पुस्तकालय स्थापना मात्र गरेर हुदैन त्यसको प्रयोग र व्यवसायिकता हुनुपर्ने बताए । पढ्ने संस्कार र पुस्तक समिक्षा गर्ने बानीको विकास गर्नुपर्ने बताए । त्यस्तै नेपाली काँग्रेसका नेता एवम् वी.पी. संग्रहालय सुन्दरीजलका अध्यक्ष परशुराम पोखरेलले पुस्तकालयको औचित्यबारे प्रस्ट पार्दै वी.पी.को विचार र सिद्धान्तलाई आम राजनीतिकर्मी एवम् नेपाली काँग्रेसका नेता तथा कार्यकर्तालाई सहि मार्ग निर्देश गर्न थप सहयोग पुग्ने विश्वास गरेका छन् । विधिको शासन र लोकतन्त्रको आधार तय गर्न वी.पी वादको आवश्यकता औल्याउँदै नेता कार्यकर्तालाई व्यक्तिवादको पछि नलाग्न आग्रह गरे । अध्यक्ष पोखरेलले आउँदै गरेको संघ र प्रदेश निर्वाचनमा नेपाली काँग्रेसलाई जिताउन असल, इमन्दार र वी.पी.वादको सिद्धान्तलाई अनुसरण गर्ने व्यक्ति उम्मेद्वार बनाउनुपर्ने बताए । पुस्तकालयको उद्घटनसंगै अक्षयकोष समेत स्थापना गरेकोले अध्यक्ष पोखरेलले वी.पी. संग्रहालय सुन्दरीजलको तर्फबाट रु. एक लाख सहयोग गर्ने घोषणा गरेका छन् । घोषणासंगै वी.पी. ले लेखिएका २४ थान पुस्तक समेत हस्तान्तरण गरेका छन् । उनले पार्टी संकटको अवस्थामा पुगिसकेको बताउँदै पार्टीको अस्तित्व बचाउन वी.पी.ले देखाएको समाजवादको यात्रालाई अंगिकार गर्नुपर्ने बताए । वी.पी.का विचार,व्यवहार र आदर्शको खोजीमा लागेका सुन्दरीजल संग्रहालयका संस्थापक अध्यक्ष परशुराम पोखरेलले देश तथा विदेशमा उहाँको योगदानको चर्चाका लागि संगठन विस्तार गरिने बताए । नेपाली काँग्रेसको नेतृत्वकर्ता र कार्यकर्तावीच वी.पी.वादको मूल्य मान्यतालाई थप प्रगाढ बनाउन वी.पी संग्रहालयले भूमिका समेत निभएको छ । कार्यक्रमका सभापति एवम् नेपाली काँग्रेस गण्डकी प्रदेशका सभापति शुक्रराज शर्माले पुस्तकालयलाई व्यवहारिक जीवनसंग जोडेर बौद्धिक ज्ञान र प्राज्ञिक चिन्तनको रुपमा विकास गर्दै व्यवस्थापनमा लाग्ने बताएका छन् । समाजको विकास र परिवर्तनका लागि अध्ययन पहिलो प्राथमिकतामा राखेर राजनीतिक सामाजिक कार्यमा लाग्नुपर्ने उनले बताए ।