धर्मान्तरण गरी परधर्म अपनाएका स्वजनहरुलाई पुनः स्वधर्ममा स्वागत गर्नका लागि विश्व हिन्दू परिषद् नेपालले शुद्धीकरण यज्ञ सम्पन्न गरेको छ । यससँगै विविध कारणले हिन्दू धर्म छोडेर इसाईकरणको षड्यन्त्रमा फसी धर्मान्तरण गरेका हिन्दू समाजका १७ परिवारका ५० जना पुनः स्वधर्ममा ससम्मान फर्किएका छन् । हवन–पूजनपूर्वक यज्ञ गरी परधर्ममा गएकाहरुलाई शुद्धीकरण गर्दै पुनः हिन्दू धर्ममा स्वागत गरिएको हो । परिषद्द्वारा आयोजित उक्त कार्यक्रममा महन्थ रामभूषण शरण जी महाराज, परिषद्का ट्रष्टी श्री ओम प्रकाश सर्राफ, जिल्ला अध्यक्ष संतोष साह, उपाध्यक्ष अमन प्रसाद गुप्ता, सचिव ब्रह्मदेव महतो, स्थानीय पदाधिकारी, पूर्णकालिक कार्यकर्ता एवं स्थानीयबासी समेतको उत्साहजनक उपस्थिति थियो । कार्यक्रममा पुनः स्वधर्ममा फर्केकाहरु अत्यन्तै हर्ष व्यक्त गर्दै विहिपलाई योे व्यवस्था मिलाई दिएकोमा आभार व्यक्त गरेका थिए साथै परधर्ममा गएको प्रति पश्चाताप समेत गरेका थिए । विविध षडयन्त्रमा परी परधर्ममा गएका स्वजनहरुलाई पुनः स्वधर्ममा स्वागतका लागि विश्व हिन्दू परिषद् नेपाल सदैव तत्पर रहेको र आगामी समयमा समेत यस किसिमको कार्यक्रमहरुलाई निरन्तरता दिने परिषद्का जिल्ला अध्यक्ष सन्तोष साहले बताउनुभयो ।