नेपाल तामाङ संघ समाजवादी केन्द्रीय कमिटिले सोनाम ल्होछार मनाउने
पुस १९, काठमाडौँ । नेकपा (एकीकृत समाजवादी) निकट नेपाल तामाङ संघले सोनाम ल्होछार मनाउने भएको छ ।
सोमबार काठमाडौंमा बसेको नेपाल तामाङ संघ केन्द्रीय कमिटीको बैठकले माघ ५ गते कार्यक्रम गर्ने निर्णय गरेको हो । नेपाल आदिवासी जनजाति महासंघ (समाजवादी) को घटक संगठन तामाङ संघले तामाङ समुदायको पहिचानसहितको साँस्कृतिक पर्व सोनाम ल्होछारलाई पार्टी अध्यक्ष माधवकुमार नेपालको प्रमुख आतिथ्यमा कार्यक्रम गरिने भएको छ ।
तामाङ संघका अध्यक्ष लाप्साङ तामाङको अध्यक्षतामा बसेको सो बैठकमा पार्टी नेतृत्वलाई समेत सुझाव दिएको छ । भर्खरै सम्पन्न संघ र प्रदेश सभा सदस्य निर्वाचनको समिक्षा गर्दै वर्तमान राष्ट्रिय राजनीतिले सिर्जना गरेको घटनाले थप चुनौती दिएको भन्दै त्यसको सामाना गर्नुपर्ने धारणा निकालेको छ । पार्टी सामाजिक न्याय, रुपान्तरण र आर्थिक समृद्धिको पक्षमा उभिएर प्रतिगामी तत्वविरुद्ध आफ्नो मुद्दा बोकेको कारण अलमलमा नपरी अडान प्रस्तुत गर्दै जानुपर्ने सुझाव दिएको छ ।
बैठकमा बोल्ने वक्ताहरुले २/४ वटा मन्त्रीको लोभमा पार्टी फस्न नहुने तर्क राखेका थिए । सरकार बाहिर रहेर पार्टी संगठन निर्माण र शुद्धिकरण अभियानमा लाग्नुपर्ने बताएका छन । पार्टीलाई सशक्त र बलियो बनाउन जुनसुकै परिस्थितिमा साथ दिन तयार रहेको नेपाल तामाङ संघ (समाजवादी) का केन्द्रीय अध्यक्ष लाप्साङ तामाङले बताए ।