वैशाख ७, काभ्रेपलाञ्चोक । काभ्रेपलाञ्चोकको खानीखोला गाउँपालिकास्थित तीन जंगलमा गए रातिदेखि डढेलो लागेको छ । धाप्ले सामुदायिक वन, साल्धारा र साल्मे सामुदायिक वनमा डढेलो लागेको गाउँपालिकाले जनाएको छ । डढेलोबाट भौतिक एवं मानवीय क्षति नभए पनि जंगलका रुखबिरुवा नष्ट भइरहेको गाउँपालिकाका अध्यक्ष इन्द्रबहादुर थिङले बताए । उनका अनुसार छिमेकी जिल्ला सिन्धुलीको जंगलमा पनि डढेलो लागेकाले यसको प्रकृतिबारे थप बुझ्दै कारण पत्ता लगाउने प्रयास भइरहेको छ । “आगलागीको कारण खोज्दै छौँ । जंगलको आगो बस्तीतर्फ आउन सक्ने बारे आज बिहानैदेखि स्थानीयलाई सचेत गराउन थालेका छौँ,” थिङले भने । गएको सोता तेमाल गाउँपालिकाको ८ र ९ नम्बर वडास्थित मेच्छे जंगलमा लागेको डढेलो स्थानीय र सुरक्षाकर्मीद्वारा तीन दिनमा नियन्त्रणमा लिइएको थियो । उक्त डढेलोबाट निजी वनमा रोपिएका करिब दुई हजार कटहरका बिरुवा समेत नष्ट भएको स्थानीय सुकुमान तामाङले बताए । गएको चैतमा पनि गाउँपालिकाका केही जंगलमा डढेलो लागेको थियो । त्यसपछि गाउँपालिकाले सुक्खायाममा आगलागीजन्य सामग्रीको अत्यावश्यकबाहेक अरू कामकाजमा प्रयोग नगर्न, डढेलो हुन नदिन तथा त्यसबाट बच्न सचेतनामूलक अपिल गरेको थियो । त्यस बेला डढेलोबाट सबैभन्दा बढी वडा नम्बर–५ स्थित जंगलमा रुख, बिरुवा क्षति भएको गाउँपालिकाले जनाएको छ । सुरक्षा निकाय, स्थानीय जनप्रतिनिधि र कर्मचारीको सक्रियतामा केही दिनमा डढेलो नियन्त्रणमा लिइएको थियो । रासस