वैशाख २७, काठमाडौं । प्रहरीले पूर्वगृहमन्त्री तथा नेपाली कांग्रेसका नेता बालकृष्ण खाणलाई आजै अदालतमा उपस्थित गराउने तयारी गरेको छ । नेपालीलाई नक्कली भुटानी शरणार्थी बनाएर अमेरिका पठाउने भन्दै आर्थिक लाभ लिने गिरोहलाई सहयोग गरेको आरोप लागेपछि आज (बुधबार) बिहान निवासबाटै पक्राउ परेका उनलाई प्रहरीले आजै अदालतमा उपस्थित गराउने तयारी गरेको हो । यस प्रकरणमा पक्राउ परेका ललितपुरका सानु भण्डारीले खाणले पनि आर्थिक लाभ लिएको बयानमा भनेका छन् । सोही बयानका आधारमा उनलाई आजै अदालत उपस्थित गराएर प्रहरीले अनुसन्धानका लागि म्याद लिने तयारी गरेको हो । खाणसँगै उनका स्वकिय सचिव नरेन्द्र केसी पनि पक्राउ परेका छन् । उनीहरु दुबै जनालाई आज जिल्ला अदालत, काठमाडौं उपस्थित गराउने तयारी रहेको प्रहरी परिसर स्रोतले जानकारी दियो । प्रहरीको उपत्यका अपराध अनुसन्धान कार्यालयले १२ चैत २०७९ मा भुटानी शरणार्थी बनाएर अमेरिका पठाइदिन्छु भन्दै असुली गरेको आरोपमा मोरङका केशव दुलाल, ललितपुरका सानु भण्डारी र पाँचथरका टेक गुरुङलाई पक्राउ गरेको थियो । यसको तीन दिनपछि मोरङका सागर राई पनि पक्राउ परेका थिए । उनीहरुको बयानका आधारमा जिल्ला प्रहरी परिसर, काठमाडौंले १९ वैशाखमा रामबहादुर थापा ‘बादल’ गृहमन्त्री हुँदा उनका सुरक्षा सल्लाहकार रहेका इन्द्रजित राईलाई पक्राउ गरेको थियो । यसको भोलिपल्ट २० वैशाखमा गृह मन्त्रालयका पूर्वसचिव एवं उपराष्ट्रपति कार्यालयका सचिव टेकनारायण पाण्डे पनि पक्राउ परेका थिए । यही प्रकरणमा नेकपा एमालेका सचिव एवं पूर्वऊर्जामन्त्री टोपबहादुर रायमाझी फरार छन् । उनका छोरा सन्दीप रायमाझी पक्राउ परिसकेका छन् । पूर्वगृहमन्त्री बादलका छोरा प्रतिक थापाविरुद्ध पनि पक्राउ पूर्जी प्रहरीले लिएको छ ।