२५ भाद्र, काठमाडौं ।  नेकपा एमालेका सांसदहरूले उपसभामुख इन्दिरा रानाको राजीनामा माग गरेका छन् । मंगलवार प्रतिनिधि सभाको बैठकका शून्य समयमा बोल्दै एमालेका सांसदहरूले नैतिक प्रश्न उठेको व्यक्ति संवैधानिक पदमा रहन नहुने बताउनुहुँदै उपसभामुख रानाको राजीनमा माग गर्नुभएको हो । 

एमालेका सांसद सूर्यप्रसाद ढकालले भन्नुभयो, “सदनभित्र र बाहिर उपसभामुखको कुरा उठिरहेको छ । नैतिकताको कुरा उठेको छ । पदीय मर्यादाको कुरा उठेको छ । मानव तस्करीसँग सम्बन्धित कुरा उठेको छ । उपसभामुख जस्तो व्यक्तिको बारेमा प्रश्न उठ्दा उपसभामुखले मार्ग प्रशस्त गर्न अथवा राजीनामा गर्नका निम्ति म जोडदार माग गर्दछु । ”

एमालेका सांसद शोभा ज्ञवाली, सरस्वती सुब्बाले पनि उपसभामुख रानालाई मार्ग प्रशस्त गर्न आग्रह गरे ।

बैठकमा उपसभामुखको राजीनामाको विषय भने प्रतिपक्षी दल माओवादी केन्द्र र रास्वपाले भने  प्रतिवाद गरेका छन् । माओवादी केन्द्रका सांसद देवेन्द्र पौडेलले उपसभामुखलाई हटाउन खोज्नु लोकतन्त्रलाई कमजोर बनाउने काम भएको बताउनुहुँदै भन्नुभयो, “केही अनलाइन समाचारले लेखेका थिए तर यो हलमा पसेपछि उपसभामुख हटाउने अभियान चलेको थाहा पाएँ । लोकतन्त्र भनेको समझदारी हो, विश्वास हो, सहकार्यको संस्कृति हो । विपक्षी दलमा पनि कैयौँ पक्षमा सरकारमा रहेकाहरूले सहमति र सहकार्य गरेर अगाडि बढ्ने कुराहरू नै लोकतन्त्रको पक्ष हो । एकजना महिला, जनजाति, सहमतिको आधारमा आउनुभएको, सामाजिक क्षेत्रमा काम गर्नुभएको उपसभामुखलाई बलियो भनिएको दुई तिहाइको सरकारले हटाउने भनेको कदममा पुग्ने कुरा निकै दुखदायी छ । यसले लोकतन्त्र अगाडि बढ्न सक्दैन । यसले लोकतन्त्रको सुदृढ र सहकार्य अगाडि बढ्दैन ।”

यस्तै रास्वपाका प्रमुख सचेतक सन्तोष परियारले उपसभामुख रानालाई पदबाट हटाउने कुरालाई लोकतन्त्र मार्ने षड्यन्त्र भएको जिकिर गर्दै सो कुरा आफ्नो पार्टीलाई मान्य नहुने बताउनुभयो ।

नेकपा माओवादी केन्द्रका देवेन्द्र पौडेल, हितराज तामाङ तथा राष्ट्रिय स्वतन्त्र पार्टी (रास्वपा)का सोविता गौतम र सुमना श्रेष्ठले उपसभामुखलाई हटाउने षड्यन्त्रमा नलाग्न आग्रह गर्नुभयो ।