जेठ १६, काठमाडौं । गोकर्णेश्वर नगरपालिकाले अपाङ्ग पुर्नस्थापना केन्द्र नेपाललाई खाद्य, शैक्षिक सामग्री तथा सहायक सामग्री हस्तान्तरण गरेको छ । आज गोकर्णेश्वर ४ भगवतीथानमा रहेको केन्द्रमा नगर प्रमुख दीपक रिसाल र उप प्रमुख सान्नानि लामाले संयुक्त रूपमा सामग्री हस्तान्तरण गरेका हुन् । अपाङ्ग पुर्नस्थापना केन्द्र नेपाललाई एक विशेष कार्यक्रम आयोजना गरी खाद्य सामग्री शैक्षिक सामग्री,आवास व्यवस्थापन सामाग्री, कम्प्युटर र स्वास्थ्य सामाग्रीहरू वितरण गरिएको हो । सामग्री वितरण गर्दै नगर प्रमुख रिसालले अपाङ्ग पुर्नस्थापना केन्द्रले पुर्नस्थापनाको क्षेत्रमा राम्रो कार्य गरिरहेकोले संस्थालाई नगरपालिकाको सधैं साथ र सहयोग रहने बताए । यसै गरि उप प्रमुख सान्नानी लामाले सुरूवातदेखि नै यो संस्थालाई आफ्नो साथ र सहयोग रहिआएकोमा जोड दिंदै संस्थाको विकास र यहाँ बस्ने अपाङ्ग बालबालिकाहरूको लागि आफूले निरन्तर सहयोग गर्ने प्रतिबद्धता व्यक्त गरिन् । नगरपालिकाले अपाङ्ग पुर्नस्थापना केन्द्रमा बस्ने असक्त र अपाङ्ग बालबालिकाहरूलाई खाद्यान्न, शैक्षिक सामग्रीहरू, कपि, किताब, कम्प्युटर, फलामको तले सुत्ने बेड, प्रिन्टर, ह्यीलचियर, बैशाकी लगायतका महत्वपूर्ण र अति आवश्यक सामग्रीहरू केन्द्रलाई हस्तान्तरण गरेको छ । कार्यक्रम संस्थाका अध्यक्ष उदय बहादुर लिम्बुको सभापतित्वमा भएको थियो । कार्यक्रममा राष्ट्रिय सहिद पार्कका अध्यक्ष सुदर्शन सिग्देल, शिक्षासेवी चन्द्र पौडेल, सल्लाहकार लक्ष्मीप्रसाद दाहाल, गोमन सिंह तामाङ, नगरपालिकाको महिला बालबालिका तथा समाज कल्याण उपशाखाका प्रमुख भिमा थापा लगायतको आतिथ्यता रहेको थियो ।