असार ५, काठमाडौं । आभोकाडोको मूल्यले नयाँ रेकर्ड कायम गरेको छ । यसअघि अधिकतम ६ सय रुपैयाँसम्म कायम भएको आभोकाडोको मूल्य भ्याट खारेजको करिब तीन हप्तामा २ सय रुपैयाँले बढेको हो । गत बजेट घोषणा गरेको दिन आभोकाडाको प्रतिकेजी औसत मूल्य ४५० रुपैयाँ तोकेको थियो । त्यसपछि बढेर जेठ २८ गतेसम्म आइपुग्दा एक सय रुपैयाँले बढेर ५५० रुपैयाँ कायम भएको थियो । अहिले सोही आभोकाडो प्रतिकेजी एक सय रुपैयाँले बढेर अधिकतम मूल्य ७ सय रुपैयाँ तोकेको छ भने औसत मूल्य ६५० रुपैयाँ कायम भएको समितिले उल्लेख गरेको छ । उक्त मूल्य हालसम्मकै उच्च हो । नेपालमा आभोकाडो सीमित व्यक्तिले मात्रै खाँदै आएका छन् । उत्पादनसँगै खपत पनि कम हुने आभोकाडो नेपालले अफ्रिकी मुलुकबाट आयात गरी आप्रर्ति गर्दै आएका छन् । भन्सार विभागको तथ्यांक अनुसार नेपालले वार्षिक ८ करोडभन्दा बढी मूल्यको आभोकाडो आयात गरेको छ । नेपाललले गत आर्थिक वर्षमा ८ करोड १ लाख रुपैयाँको २ लाख ८४ हजार केजी आभोकाडो आयात गरेको थियो । त्यस्तै, चालु आर्थिक वर्षको १० महिनाको अवधिमा नेपालले ६ करोड २३ लाख रुपैयाँको १ लाख ८५ हजार केजी आभोकाडो आयात गरेको देखिन्छ । विभागका अनुसार नेपालले युगान्डा र केन्याबाट मात्रै आयात गरिरहेको छ ।