४ असोज, काठमाडौं । बुधबारबाट उत्रिएका नेपाल शिक्षक महासंघ नेपालको आन्दोलनले काठमाडौं ट्राफिक व्यवस्थापन अस्तव्यस्त बनेको छ। सरकारले संसद सचिवालयमा दर्ता गरेको विद्यालय शिक्षा विधेयकको विरोधमा देशभरका सामुदायिक विद्यालयमा पठन-पाठन नै ठप्प पारी काठमाडौं आएका शिक्षकको आन्दोलनका कारण ट्राफिक व्यवस्थापन अलपत्र देखिएको हो । काठमाडौंको थापाथली, माइतीघर, सिंहदरवार, नयाँ बानेश्वर लगायतका क्षेत्रमा सवारी आवागमन ठप्प भएको छ । त्यस्तै काठमाडौँको भित्री सडकमा सार्वजनिक सवारी साधन प्रवेशमा निषेध गरिएको छ भने भित्री सडकमा पनि निजी सवारी साधनलाई मात्रै प्रवेश दिइएको छ । आन्दोलनका कारण काठमाडौँका सबैजसो स्थानमा सुस्तरुपमा सवारीसाधन गुडेका छन् । संसदमा दर्ता भएको शिक्षा विधेयकमा महासङ्घले विभिन्न १८ बुँदे असहमति प्रकट गरेको छ। जसमा सरुवा बढुवा, दरबन्दी, स्थानीय पालिकाअन्तर्गत नबस्नेसहितका माग छन्। सो माग पूरा नभएसम्म आन्दोलन नरोकिने महासंघले चेतावनी दिएको छ। उनीहरूले विद्यालय शिक्षक कर्मचारीमाथिको 'ज्यादती बन्द गर, शिक्षामा कुल बजेटको २० प्रतिशत लगानी गर, शिक्षामन्त्री राजीनामा दे, कक्षा १२ सम्मको पूर्ण निःशुल्क शिक्षाको व्यवस्था गर्, १० वर्षमा आवधिक बढुवाको ग्यारेन्टी गर्, राहत र उच्च मा.वि. दरबन्दी स्वीकृत गर्, शिक्षा विधेयक संशोधन गर्' लगायतका नारा लेखिएका प्लेकार्ड बोकेर विरोध जनाएका हुन्। बुधबार शिक्षकहरूले  माइतीघरमा भेला भई गरेका विरोध प्रदर्शन दोस्रो दिन पनि यथावत छ।