५ असोज, काठमाडौं । आज नेपाली साहित्यका शिखर व्यक्तित्व श्री भैरव अर्याल ज्यूको ८७ औ जन्म जयन्ती । नेपाली साहित्यका प्रसिद्ध हास्यव्यङ्ग्य निबन्धकार भैरव अर्यालको जन्म वि.सं. १९९३ असोज ५ गते ललितपुरको कुपण्डोलमा भएको हो । उनको निधन भने काठमाडौंको गोकर्णमा वि.स.स २०३३ मा भएको हो । उनकी माताको नाम खेमकुमारी अर्याल र पिताको नाम होमनाथ अर्याल हो । उनले सर्वप्रथम वि.सं. २००९ सालमा 'नयाँ जीवन’ शीर्षक कविता रचेर लेखनयात्रा सुरु गरेका हुन् । उनको पहिलो रचनाका रूपमा वि. सं. २०१३ मा 'नव निर्माण' शीर्षकको कविता प्रकाशित भएको थियो। तत्कालीन नेपाल राजकीय प्रज्ञा प्रतिष्ठानद्वारा ०२२ सालमा आयोजित पहिलो कविता महोत्सवमा उनी प्रथम भएका थिए । उनीद्वारा सम्पादित ‘साझा कथा' (०२५) निकै प्रसिद्ध छ। अर्यालका 'जय डीु, 'काउकुतीु, 'गलबन्दी', 'दशऔतारु, 'टेढो ऐना' लगायतका कृति निकै लोकप्रिय छन् । त्यसलगायत लाहुरको यात्रा, भान्सा भो हजुर ? नाम फेर्ने धुनमा, केही राष्ट्रिय रोग : एक अनुसन्धान, मपाईं,(निबन्धसंग्रह), उपवन(कवितासंग्रह), राष्ट्रिय आह्वन(लघुकाव्य), इतिश्री(हास्यव्यङ्ग्य निबन्धसंग्रह), नेपाली काव्यमा प्रकृति(समालोचना) पनि कृतिहरू छन् । सामाजिक, आर्थिक, धार्मिक, सांस्कृतिक, राजनीतिक आदि विभिन्न क्षेत्रमा व्याप्त विसङ्गतिप्रति व्यङ्ग्य गर्नु उनको मुख्य विशेषता रहेको पाइन्छ । मानवीय स्वभावमा रहने कमी कमजोरीप्रति पनि आलोचना तथा व्यङ्ग्य गर्नु उनका निबन्धको उद्देश्य रहेको देखिन्छ । उनी पाठकलाई हँसाएर व्यङ्ग्यको तितोपनालाई ग्रहण योग्य बनाउन समर्थ छन् । उखान टुक्काका साथै अनुकरणात्मक शब्दको विशिष्ट प्रयोग गरेर सरल, सहज र रोचक भाषा शैलीका माध्यमबाट सामाजिक विकृतिहरूमाथि चोटिलो व्यङ्ग्य गर्नमा खप्पिस अर्यालका निबन्धहरूमा विशेष गरेर समाजसुधार, देशभक्ति, मानवतावाद र प्रगतिवादी विचारको प्रस्तुति पाइन्छ ।