१० मंसिर, काठमाडौं । स्वास्थ्य तथा जनसंख्या मन्त्री मोहनबहादुर बस्नेतलाई चिकित्सा शिक्षा सुधारका अभियन्ता प्रा.डा. गोविन्द केसीले पदमुक्त गर्न माग गरेका छन् । आइतवार उनले एक विज्ञप्ति जारी गर्दै मन्त्री बस्नेतलाई पदमा बसिरहनु लोकतान्त्रिक मूल्यमान्यताको बर्खिलाप भएको भन्दै तत्काल पदमुक्त गर्न माग गरेका हुन् । साथै डा. केसीले मन्त्री बस्नेत माफियाहरुको नाइके भएको आरोपसमेत लगाएका छन् । डा. केसीले विज्ञप्तिमा भनेका छन्- ‘स्वास्थ्य मन्त्रीको हैसियतले यी चुनौतीहरूको सम्बोधन गर्नु परम कर्तव्य बन्थ्यो तर मापदण्ड नपुगेका र विगतमा ऐन विपरीत सञ्चालन गरेका शिक्षालयहरूलाई दण्डित गर्नुको सट्टा ऐन विपरीत सम्बन्धन दिलाउन सम्बन्धित सरकारी निकायहरूलाई दबाब दिनु गैर कानुनी र खेदपूर्ण कार्य हो। यसले के प्रमाणित गर्छ भने देउवा र प्रचण्ड जीका स्वास्थ्य मन्त्री माफिया हरुका नाइके हुन र उनी मन्त्री पदमा रहिरहनु लोकतान्त्रिक मूल्यमान्यताको बर्खिलाफ हो। निजलाई तत्काल पदमुक्त गरियोस्। यस्तै, मन्त्री बस्नेतले मर्यादा विपरीतका क्रियाकलाप गरी आइरहेको आरोप डा. केसीले लगाएका छन्। उनका अनुसार स्वास्थ्यमन्त्रीको पद सम्हालेदेखि नै माफियाहरुको पक्षमा नग्न रुपमा नै वकालत गर्दै आइरहेका छन् र सम्बन्धित सरकारी निकायलाई खुला रूपमा दबाब र धम्की दिइरहेका छन् । स्वास्थ्यमन्त्री बस्नेतले हिजो (शनिवार) राष्ट्रिय ट्रमा सेन्टरले काठमाडौंमा आयोजना गरेको एक कार्यक्रममा बोल्दै डा. केसी मेडिकल माफियाद्वारा सञ्चालित भएको आरोप लगाएका थिए । स्वास्थ्यमन्त्री बस्नेतको अभिव्यक्तिप्रति आलोचना गर्दै डा. केसीले आइतवार विज्ञप्ति मार्फत आरोप खण्डन गर्नुका साथै स्वास्थ्यमन्त्रीलाई बर्खास्त गर्न माग गरेका हुन् । यस्तै, केसीले चिकित्सा शिक्षा आयोग बनेको पाँच वर्षकै अवधिमा सन्तोषजनक रूपमा काम गरिरहेको बताएका छन् ।