माघ ३, काठमाडौं । काठमाडौंको कागेश्वरी मनोहरा नगरपालिका–५ स्थित भरत थापाको दुई तल्ले पक्की घरमा नक्कली मदिरा बनाएको आरोपमा नौजना पक्राउ परेका छन् । प्रहरीका अनुसार स्वदेशी तथा विदेशी विभिन्न ब्राण्डका रक्सीका नाममा नक्कली मदिरा (रक्सी) बजारमा पठाउने गरेको गुनासो र गोप्य सूचना प्राप्त भएपछि अनुसन्धानपश्चात् नौजनालाई पक्राउ गरेको हो । थापाको घर भाडामा लिई विनोद कुमार कार्कीले नक्कली खुकुरी रम, गोल्डेन ओएक, फाइटर, सिङ्गनेचर, ३६५ ब्ल्याक लगायतका मदिरा बनाउने गरेको खुलेको हो । काठमाडौं उपत्यका अपराध अनुसन्धान कार्यालयका प्रहरी उपरीक्षक एवम् प्रवक्ता मिलन केसीले यसमा संलग्न नौ जनालाई पक्राउ गरेको जानकारी दिए । पक्राउ पर्नेमा रामेछाप घर भएका मनोज खत्री, महेश खत्री, मनिष खत्री र विनोदकुमार कार्की, सिन्धुपाल्चोक घर भएका मोहन खड्का र रोशन कार्की, सिन्धुली घर भएका गौरव तामाङ र लेखविक्रम थापा तथा काठमाडौं घर भएका सुमन नगरकोटी रहेका छन् । काठमाडौँ उपत्यकामा स्वदेशी तथा विदेशी ब्राण्डका गुणस्तरहिन नक्कली मदिराहरू उत्पादन गरी कालो बजारी भइरहेको भन्ने गोप्य सूचनाको आधारमा कार्यालयबाट खटिएको विशेष अनुसन्धान टोलीले माघ २ गते कार्कीले भाडामा लिई बसेको कोठामा खानतलासी गरेको थियो । सो क्रममा मदिरा बनाउन प्रयोग गर्ने समानहरु, सगुन ब्राण्डको मदिरा पदार्थ, चिनि–पानी मिश्रीत तरल पदार्थ, विभिन्न रक्सीहरूको खाली बोतल, आन्तरिक राजश्व विभागको अन्त शुल्कको स्टिकरहरु, लेवलिङ एवम् प्याकेजिङ गर्न प्रयोग गरिने सामानलगायत अन्य विभिन्न सामग्रीहरू फेला पारेको प्रवक्ता केसीको भनाइ छ ।