माघ ९, काठमाडौं । न्युरोड क्षेत्र सडकमा काठमाडौं महानगरपालिकाको  पार्किङ गर्न रोक लगाउने निर्णयविरुद्ध व्यापारीहरु आन्दोलित भएका छन् । व्यापार घट्ने भन्दै उनीहरु आज सटर बन्द गरेर वडा कार्यालय पुगेर महानगरपालिकाको निर्णयविरुद्ध सडकमा उत्रेका हुन । उनीहरूले  महानगरपालिकाको निर्णय सच्याउन माग गरेका छन् । काठमाडौं महानगरपालिकाले आज (मंगलवार)देखि कालोपत्रे सडकमा सवारी पार्किङ गर्न नदिने निर्णय गरे पनि काठमाडौं टावरमा निःशुल्क पार्किङको व्यवस्था मिलाउने जनाएको छ । आजदेखि न्युरोड क्षेत्रका सडकमा ‘नो पार्किङ’ लेखिएको संकेत चिह्न राखेको छ । यसैगरी नगर प्रहरीहरू खटाएर पार्किङ गर्न आउनेलाई कालोपत्रे सडकमा पार्किङ गर्न नपाइने जानकारी गराएको छ । वीर अस्पताल अगाडिको सडक खण्डमा पार्किङ गरिएका मोटरसाइकलहरु भने नगर प्रहरीको सवारी साधनको प्रयोग गरेर उठाएको छ । महानगर प्रहरी बलका प्रमुख नगर प्रहरी (वरिष्ठ उपरीक्षक) राजुनाथ पाण्डेका अनुसार धर्मपथ, जुद्ध शालिकदेखि इन्द्रचोक, खिचापोखरी, महाबौद्ध, वीर अस्पताल लगायत क्षेत्रका सडकमा पार्किङ निषेध गरिएको छ । यसअघि काठमाडौं महानगरपालिकाले दरबारमार्ग क्षेत्रको सडक किनारमा पनि पार्किङ निषेध गरेको थियो । सो क्षेत्रका व्यापारीहरु त्यसको विरोधमा उत्रिए पनि महानगरपालिकाले पार्किङ निषेधको निर्णय फिर्ता लिएको छैन ।