बाटुलेसिम खानेपानी आयोजनाको नगरप्रमुख दीपक रिसालद्वारा निरीक्षण
माघ १५, काठमाडौं । गोकर्णेश्वर नगरपालिका वडा नं ३ तारेभिर क्षेत्रमा बनिरहेको बाटुलेसिम खानेपानी आयोजनाको नगर प्रमुख दिपक रिसालले निरीक्षण गर्नु भएको छ । शिवपुरी नार्गाजुन राष्ट्रिय निकुञ्जमा ४ किमि भित्र रहेको स्यालमति खोलाबाट सुन्ताखानसम्म खानेपानी ल्याउन आयोजनाको कार्य भइरहेको छ ।
शनिवार गोकर्णेश्वर नगरपालिकाका नगर प्रमुख दीपक रिसालले सो आयोजनाको कार्यप्रगतिको स्थलगत निरीक्षण तथा मुहान क्षेत्रका अवलोकन गर्नुभयो । सो अवसरमा उहाँले २ वर्षमा सबै नगरवासीलाई घर घरमा खाने पानी पुर्याउने प्रतिबद्धता अनुसार कार्य भइरहेको भन्दै खुसी व्यक्त गर्नु भयो ।
यस खानेपानी आयोजनाबाट गोनपा ३ अन्र्तगत साविक बालुवा गाविस अन्र्तगतका वडा नं. १ र २ का सुन्ताखानको पिप्ले, डाँडाघर, डरेटोल, बेशीगाउँ लगायतका क्षेत्रका वासिन्दा लाभान्वित हुनेछन् । बस्तिबाट साढे ४ कि.मि. टाढाबाट पाइपलाइनमार्फत आउने पानीले ४०० घरधुरी लाभान्वित हुने छन् ।
अफ्टेरो भु–बनौट भएको स्थानमा भएको कार्य प्रगतिको सन्दर्भमा रिसालले आयोजना निर्माण समितिका पदाधिकारी, प्राविधिक र श्रमिकहरुको प्रशंसा गर्नु भयो ।
खानेपानी योजनामा स्थानीय समितिले श्रमदान गरिरहेको छ । पुष ४ गतेबाट शुरु भएको खानेपानी योजना निर्माण कार्यमा जटिल भु–बनौटका बाबजुद पनि दैनिक आवश्यकता अनुसार १०–१८ जनासम्म खटिएर काम भईरहेको समितिका अध्यक्ष पवन विष्टले बताउनु भयो । बाटुलेसिम खानेपानी आयोजना नगरपालिकाको २० लाख आर्थिक सहयोगमा निर्माण भईरहेको छ ।
नगर प्रमुख दिपक रिसाल, बाटुलेसिम खानेपानी व्यवस्थापन उपभोक्ता समितिले निर्माण गरिरहेको योजनाको निरिक्षणका लागि समितिका पदाधिकारी, प्राविधिक, सुन्ताखान युवा क्लबका अध्यक्ष हरिबोल विष्ट, स्थानीय सहितको टोली सहित योजनाको निरिक्षणमा जानु भएको थियो ।
आयोजना अन्तर्गत अहिले झण्डै २ किमि वरसम्म पानी आईसकेको छ ।