माघ १५, काठमाडौं । जापानको राष्ट्रिय फुल “साकुरा” जोरपाटी नयाँबस्तिमा बागमति किनारमा रोपिएको छ । जापानको भन्दा फरक हावापानि भएको स्थानमा साकुरा हुर्काउन सजिलो छैन । साकुरालाई राम्रोसँग हुर्काउन धेरै मिहिनेत गर्नुपर्छ । गोकर्णेश्वर नगरपालिका वडा नं. ५ स्थित पहेलो पुलमा शनिवार  बागमति किनारमा रोपिएको “साकुरा”को बोटको गोडमेल गरिएको छ । शनिवार जाइकाको विज्ञ सहित साकुराको गोडमेल तथा साकुराको बोटमा पानी राख्ने, बोट सिधा पार्ने कार्यहरु गरिएको छ । साकुरा हुर्केर फुल्न थालेपछि पहेलो पुल क्षेत्रको पहिचान र नाम नै साकुराको नाममा चिनिने नगर प्रवक्ता तथा वडा अध्यक्ष नारायण सुवेदिले बताउनु भयो । वडाको सौन्दर्यीकरणका लागि नगरपालिका र वडाले विभिन्न सामाजिक संघसंस्थासँग समन्वय गरी काम गर्ने सुवेदिले बताउनु भयो । वागमति सरसफाइ तथा साकुराको गोडमेल कार्यमा नगर प्रवक्ता तथा वडा अध्यक्ष नारायण बहादुर सुवेदी, वडा सदस्यहरु लक्ष्मी पुडासैनी, श्री बहादुर योगी, धर्म थिङ लामा, माथिल्लो बागमति सरसफाइ अभियानका अभियन्ताहरु, पुडासैनी मैत्री समाजका पदाधिकारी लगायतको उपस्थिती रहेको थियो । नयाँबस्ति पहेँलो पुल बागमति किनारमा जाइकाको सहयोगमा ६२ बोट साकुरा सारिएको छ भनें साकुराको बोटको संरक्षण र सिँचाईका लागि गोकर्णेश्वर नगरपालिका वडा नं. ५ को सहयोगमा पाइप लाइन जडान, बोटको सुरक्षाको लागि ग्रिल जालीको बार राख्ने तथा बारमा रंगरोगन गर्ने कार्य भएको नगर प्रवक्ता तथा वडा अध्यक्ष नारायण बहादुर सुवेदीले जानकारी दिनु भयो । जापानिज भाषा स्कुल संघ नेपाल (जलसन) को सहयोगमा गोकर्णेश्वर नगरपालिका, वडा कार्यालय, पुडासैनी मैत्री समाज लगायतको संयुक्त समन्वयमा साकुरा पार्क निर्माण गर्ने उदेश्यले वागमति किनारमा डेढ वर्ष अगाडि साकुराको बोट सारिएको हो । यसैगरी, माघ १३ गते शनिवार जनप्रतिनिधिको उपस्थितीमा साकुराको स्याहारको साथै बागमति सरसफाईको ५१९ औं हप्ताको कार्य समेत भएको थियो ।