खगेन्द्र नवजीवन केन्द्रको बेथिति र अनियमितताबारे उच्चस्तरीय छानबिन सुरु
माघ २२, काठमाडौँ । शनिवारदेखि नेपाल अपाङ्ग सङ्घ खगेन्द्र नवजीवन केन्द्रको बेथिति र अनियमितताबारे अध्ययन गर्न गठित उच्चस्तरीय छानबिन एवं अनुगमन समिति गठनले काम सुरु गरेको छ । जिल्ला प्रशासन कार्यालय काठमाडौँका सहायक प्रमुख जिल्ला अधिकारी माधवप्रसाद ढुङ्गानाको संयोजकत्वमा गठित सात सदस्यीय छानबिन समितिले काठमाडौँको गोकर्णेश्वर नगरपालिका–६ जोरपाटीस्थित सङ्घको कार्यालयमा शनिवार अनुगमन र निरीक्षण गरेको हो ।
नेपाल अपाङ्ग सङ्घ खगेन्द्र नवजीवन केन्द्रको अनियमितता, बेथिति र भ्रष्टाचारको सन्दर्भमा विषय उठेपछि गठित समितिले छानबिन थालेको र स्थलगत निरीक्षणसँगै अन्य विषयमा पनि अध्ययन शुरु भएको छ। समितिले केन्द्रको सञ्चालन विधि र सम्भावित भ्रष्टाचारबारेमा समेत अध्ययन गर्नेछ ।
अध्ययन समितिले खगेन्द्र नवजीवन केन्द्रको सम्पूर्ण खर्चको विवरण, निर्णयका माइन्युट पेस गर्नुपर्ने निर्देशन दिएको छ । पदाधिकारीले सङ्घको सम्पत्ति दुरुपयोग गरेको सन्दर्भमा पनि छानबिन समितिले अध्ययन गर्नेछ ।
खगेन्द्र नवजीवन केन्द्रमा आश्रित नागरिकले मङ्सिर पहिलो सातादेखि सङ्घर्ष समिति गठन गरेर एक महिनासम्म तालाबन्दी र धर्नासहित आन्दोलन गरेका थिए ।
शनिवार जिल्ला प्रशासन कार्यालय काठमाडौँका सहायक प्रमुख जिल्ला अधिकारी माधवप्रसाद ढुङ्गाना सहित समितिले काठमाडौँको गोकर्णेश्वर नगरपालिका–६ जोरपाटीस्थित सङ्घको कार्यालय अनुगमन र निरीक्षण गरेको थियो ।