गोकर्णेश्वरमा हेल्थ कार्ड शुभारम्भ : स्वास्थ अवस्थाबारे क्यु आर कोडबाट जानकारी लिन सकिने
फागुन ४, काठमाडौं । गोकर्णेश्वर नगरपालिकाले ‘गोकर्णेश्वर हेल्थ कार्ड’ शुभारम्भ गरेको छ । फागुन ३ विहीवार गोकर्णेश्वर नगरपालिकाको सभा–हलमा एक कार्यक्रम आयोजना गरि सो कार्डको शुभारम्भ गरिएको हो ।
हेल्थ कार्डमा नगरवासीको स्वास्थ अवस्थाको जानकारी हुने र क्यु आर कोड स्क्यान गरेपछि नागरिकको स्वास्थ अवस्थाको सम्पुर्ण प्रोफाईल हेर्न सकिने छ ।
यो सेवा सुरु गर्ने गोकर्णेश्वर नगरपालिका नेपालकै पहिलो स्थानीय तह हो ।
नगर प्रमुख दीपक रिसालले सेवाबारे जानकारी गराएका छन् । मेयर रिसालले नगरवासीहरूको सु-स्वास्थ्यलाई उच्च प्राथमिकता दिँदै पछिल्लो अभ्यास मुलुककै समग्र स्वास्थ्य क्षेत्रका लागि कोसेढुंगा साबित हुने बताए । हेल्थ कार्ड सुरु भएपछि स्वास्थ्य सेवामा जोडिने सेवाग्राही, सेवा प्रदायक स्वास्थ्य संस्थाहरू तथा स्वास्थ्यकर्मीहरू, समन्वय र सुपरिवेक्षण गर्ने वडा कार्यालय एवं नगरपालिकाले तोकेका सरोकारवालाहरूलाई एउटै प्रकृतिले जोडेर एक “पालिका स्वास्थ्य प्रणाली र नमुना” बनाउने सफ्टवेयरको माध्यमबाट नगरवासीको स्वास्थ्य अवस्था तथा उपचारको जानकारीलाई लिइने मेयर रिसालले जानकारी दिए । त्यस्ता जानकारी एवम् सूचनाहरू विशिष्ट कृत युनिक हेल्थ आइडीको माध्यमबाट सुरक्षित राख्दै जाने र त्यसमध्ये अत्यावश्यक निश्चित हेल्थ रेकर्ड “क्यु आर कोड”मार्फत् बिरामी वा नागरिकले चाहेको अवस्थामा जुनसुकै स्थानबाट स्वास्थ्य संस्था वा स्वास्थ्यकर्मीले प्राप्त गर्न सक्नेगरी “गोकर्णेश्वर हेल्थ कार्ड”को परिकल्पनाबाट सिस्टम तयार गरिएको पनि उनले बताए ।
हेल्थ कार्ड मेयर लगायत नागरिकलाई हस्तान्तरण गरेर कार्यक्रमको शुभारम्भ गरिएको थियो ।
हेल्थ कार्डको बारेमा चिकित्सक डा. सुवास प्याकुरेलले प्रस्तुति दिएका थिए ।
स्वास्थ्य स्थिति र नगरपालिकाले प्रदान गर्ने स्वास्थ्य सुविधाका दृष्टिले फरक वर्ग र तहका ज्येष्ठ नागरिक, बालबालिका, गर्भवती महिला, खेलाडी, शिक्षक, रोग अनुसारका बिरामीहरू लगायतलाई फरक फरक कलर कोडिङ गर्न सकिने यस प्रणालीले नगरपालिकाको स्वास्थ्य सेवा प्रवाह र नीति निर्माणलाई तथ्याङ्कपरक तरिकाले व्यवस्थित गर्नेछ ।