फागुन २०, काठमाडौं । गोकर्णेश्वर नगरपालिका वडा नं. ८ मा शनिवार आयोजना गरिएको ट्राफिक तथा सडक प्रयोग सम्बन्धी जनचेतना मूलक कार्यक्रम सम्पन्न भएको छ । कार्यक्रम ट्राफिक जनचेतना अभिवृद्धिका लागि गरिएको थियो भनें सो अवसरमा वडाका विभिन्न महिला समुहहरुलाई ट्राफिक नियम सम्वन्धि फ्लेक्स वितरण गरिएको थियो । वडा नं. ८ को सभाहल, बेशीगाउँमा आयोजित कार्यक्रममा ट्राफिक इन्सपेक्टर लेख नाथ मैनालीले ट्राफिक नियमबारे सचेतनामुलक प्रस्तुती राख्नु भएको थियो । मैनालीले ट्राफिक नियमलाई बुझेर अविभावकले आफ्नो परिवारका सदस्यलाई राम्ररी बुझाउनु पर्ने बताउनु भयो । उहाँले ट्राफिक नियम उलंघन गर्नेलाई समुदायले सचेत बनाउन सके नियम तोड्ने मानसिकता भएकाहरु पनि सच्चिन बाध्य हुने बताउनु भयो । वडा अध्यक्ष नन्दलाल श्रेष्ठले विकास भनेको भौतिक प्रगतिमात्र नभएकोमा जोड दिनु हुँदै सवारी साधन प्रयोगकर्ता बढ्दै जाँदा दुर्घटनाबाट भौतिक र मानवीय क्षती बढेकोले सचेतनका लागि कार्यक्रम आयोजना गरिएको बताउनु भयो । कार्यक्रमलाई वडा सदस्य सीता तिमल्सिना, सुमन लामाले सम्बोधन गर्नु भएको थियो । कार्यक्रममा वडा सदस्य तथा कार्यपालिका सदस्य सोविता मिजार, विभिन्न महिला समुहका पदाधिकारी, सदस्य एवम् ज्येष्ठ नागरिक, युवाहरुको उपस्थिती रहेको थियो । यसैगरी कार्यक्रम सञ्चालन वडा सचिव सुदिप हमालले गर्नु भएको थियो ।