फागुन २२, काठमाडौं । मोरङको पथरीशनिश्चरे-७ लामा टोलीस्थित शौचालय गएकी किशोरी ज्ञानुकुमारी राईको धारिलो हतियार प्रहार गरी विभत्स हत्या गरिएको छ । मोरङ प्रहरीका प्रवक्ता डिएसपी रञ्जन कुमार दाहालका अनुसार सोमवार राति शौच गर्न जाँदा पछाडिबाट अपरिचित व्यक्तिले धारिलो हतियार प्रहार गरी किशोरीको हत्या भएको हो । सुत्नुअघि शौचालय जाने क्रममा बसेकै घरको कम्पाउण्डमा राति १०ः३० बजेतिर अपरिचित व्यक्तिले धारिलो हतियार पटक–पटक प्रहार गरेर निर्मम तरिकाले हत्या गरिएको उनले बताए । "एकदमै बीभत्स अवस्थामा घरको परिसरमा शव भेटिएको छ,’ उनले भने, ‘घटनाको प्रकृति हेर्दा पछाडिबाट हतियार प्रहार भएको देखिन्छ। घटनासँग सम्बन्धित थप कुरा अनुसन्धानपछि खुल्छ।’ हतियार प्रहारबाट गर्धन, अनुहार र दाहिने पाखुरामा गहिरो चोट लागेको अवस्थामा ज्ञानकुमारीको शव फेला परेको डिएसपी दाहालले जानकारी दिए। घर परिसरमै रहेको शौचालय जाने क्रममा बालिकामाथि हतियार प्रहार भएको भनिएको छ। चिच्याएको आवाज आएपछि हेर्दा किशोरीको हत्या भएको थियो । खोटाङको ऐँसेलुखर्क गाउँपालिका–६ सल्ले घर भएकी राइ ज्ञानमति पथरीशनिश्चरे नगरपालिका–७ लामा टोलीस्थित दाजु (मामाको छोरा) विनोद राईको घरमा २ वर्षदेखि बस्दै आएको खुलेको प्रहरीको भनाइ छ। प्रहरीका अनुसार उनी पथरीशनिश्चरे–१ मा रहेको पञ्चायत माध्यमिक विद्यालयको कक्षा ७ मा अध्ययनरत थिइन्। ज्ञानुकुमारीका मामाका छोरा विनोदले आफ्नो घरमा सुम्निमा होटल नामको खाजा नास्ता पसल पनि सञ्चालन गरेका छन्। २ वर्षअघि पहाडबाट झरेकी ज्ञानुकुमारी नास्ता पसलमा दाजुलाई सहयोग गर्दै उनकै घरमा बसेर पढ्ने गरेको डिएसपी दाहालले बताए। प्रहरीका अनुसार घटनामा संलग्नको पहिचान हुन सकिरहेको छैन। घटनाको अनुसन्धानका लागि मोरङ प्रहरी प्रमुख एसपी नवराज कार्की नेतृत्वको टोली घटनास्थलमा खटिएको छ।