५ भाद्र, काठमाडौं ।  स्वास्थ्य तथा जनसंख्या मन्त्रालयले संघीय अस्पतालका बिग्रिएका स्वास्थ्य उपकरण मर्मतको जिम्मा राष्ट्रिय आविष्कार केन्द्रलाई दिने भएको छ । अस्पतालमा खेर गइरहेका उपकरण मर्मतमा सघाउन बुधवार स्वास्थ्य तथा जनसंख्यामन्त्रालयका गुणस्तर मापन तथा नियमन महाशाखा प्रमुख डा. मदन उपाध्याय र केन्द्रका अध्यक्ष महावीर पुनले सम्झौतामा हस्ताक्षर गरी मर्मतको जिम्मा आविष्कार केन्द्रलाई दिने भएको हो । 

स्वास्थ्य तथा जनसंख्यामन्त्री प्रदीप पौडेलले केही दिन अघि अस्पतालका उपयोगमा आउन नसकेका स्वास्थ्य उपकरण मर्मतमा सघाउन पुनसँग आग्रह गर्नुभएको थियो । त्यसलगत्तै मन्त्रालयले केन्द्रका अध्यक्ष पुनको नेतृत्वको केन्द्रसँग औपचारिक सम्झौता गरेको हो ।

सम्झौता अनुसार हाल मन्त्रालयअन्तर्गतका १७ अस्पतालमा बिग्रिएर रहेका स्वास्थ्य उपकरणको अवस्थाबारे जानकारी लिने र त्यसपश्चात मर्मत सम्भव भएका सबै उपकरणको केन्द्रका प्राविधिकहरुले मर्मत गर्ने छ ।

कार्यक्रममा मन्त्री पौडेलले अस्पतालमा मर्मत अभावमा उपयोगमा आउन नसकेका उपकरणलाई केन्द्रको सहयोगमा मर्मतपछि उपचार सेवामा सहजता आउने विश्वास व्यक्त गर्नुहुँदै भन्नुभयो, “देशको सीप प्रयोग गरेर स्वदेशमै केही गर्न खोजिरहेका वैज्ञानिकहरुको योगदानलाई यो राज्यका तर्फबाट कदर हो  ।”  साथै उहाँले स्वदेशी सीपमा कम खर्चमा उपकरणको मर्मत हुने आशा पनि व्यक्त गर्नुभयो । 

केन्द्र अध्यक्ष पुनले राज्यले  विश्वास गरेर ठूलो जिम्मेवारी दिएको बताउनुहुँदै भन्नुभयो, “ अब हामी हाम्रै श्रोत साधन र प्राविधिकको उपयोग गरेर मर्मत गर्नेछौं ।”