मिस युनिभर्स नेपाल २०२४ को उपाधि सम्पदा घिमिरेलाई

२७ भाद्र, काठमाडौं । ‘मिस युनिभर्स नेपाल–२०२४’ को उपाधि सम्पदा घिमिरेले जित्नुभएको छ । बुधवार बेलुका ललितपुरको गोदावरीस्थित सनराइज कन्भेन्सन सेन्टरमा आयोजित फिनालेमा उहाँले २१ प्रतिस्पर्धीलाई पछि पार्दै उपाधि जित्नुभएको हो ।

आयोजक संस्था ग्लोबल ग्ल्यामरकी प्रमुख संगीता पुरीले यसवर्षकी विजेतालाई ताज पहिराइदिनुभयो । स्मृति सिंह फस्ट रनरअप, अक्सिता क्षेत्री सेकेण्ड रनरअप, करिभिना इभा थर्ड रनरअप र सुजल बम फोर्थ रनरअप हुनुभयो ।

फिनालेमा उपाधिका लागि २२ जना प्रतिस्पर्धी थिए । पूर्वमिस नेपाल माल्भिका सुब्बासहित विश्वचर्चित भ्लगर, कन्टेन्ट क्रिएटर तथा ब्युटी पेजेन्ट विश्लेषक लुइस पोर्टेल्सले मिस युनिभर्स नेपालको फिनाले होस्ट गर्नुभएको थियो ।

आगामी नोभेम्बरमा मेक्सिकोमा हुने मिस युनिभर्स प्रतियोगितामा घिमिरेले नेपालको प्रतिनिधित्व गर्नुहुनेछ ।