मेलम्ची बाढी ः चनौटेको रातो पुल बगायो, मेलम्चीको रेडियो भवन पनि ढल्यो
साउन १७, काठमाडौं । सिन्धुपाल्चोकमा शनिबार रातिदेखि आएको बाढीले चनौटेको रातो पुल बगाएको छ । यो पुल मेलम्ची–७ र ८, पाँचपोखरी १ र २ र हेलम्बुका धेरै वडा जोड्ने एक मात्र विकल्पका रूपमा रहेको थियो । स्थानीयवासी हस्त पण्डितले आज बिहान ७ः४५ बजे पुल बगाएको जानकारी दिएका हुन् ।पुल बगाएसँगै यस भेगमा सवारी आवतजावत बन्द भएको छ ।
त्यस्तै बाढीले ग्यालथुममा रहेको एउटा झोलुङ्गे पुल बगाएको छ । जिल्ला प्रहरी कार्यालय सिन्धुपाल्चोकका प्रहरी उपरीक्षक राजन अधिकारीले नदीको सतह बढेपछि ग्यालथुम बजारसमेत जोखिममा रहेको जानकारी दिनुभएको छ।
मेलम्ची उर्लिरहेकाले थप क्षति हुनसक्ने भएकाले सचेत रहन प्रशासनले आग्रह गरेको छ । यसअघि हेलम्बु गाउँपालिकाको नाकोतेखोलामा बाढी आएको भन्दै मेलम्ची खोला तटीय क्षेत्रका बासिन्दालाई सो गाउँपालिकाका अध्यक्ष निमा ग्याल्जेन शेर्पाले शनिबार राति नै सतर्क हुन अनुरोध गर्नुभएको थियो ।
मेलम्चीको रेडियो भवन पनि ढल्यो
बाढीले रेडियो मेलम्चीको भवन ढलाएको छ । रेडियो मेलम्चीका अध्यक्ष डम्बर रसिक भारतीका अनुसार गएराति १२ः४०बजेतिर बाढीले भवन बगाएको हो ।
यसअघि गत असार १ गते आएको भीषण बाढीले हेलम्बु, किउल र मेलम्ची बजारलाई बगरमा परिणत गरेको थियो । त्यतिबेला नै बाढीमा डुबे पनि रेडियो मेलम्चीको भवन भत्किएको थिएन ।