साउन २०, काठमाडौं । कालीकोट जिल्लामा दैलेख जिल्लाका तीन ठाउँबाट सडक जोडिने भएको छ । कालीकोटमा दैलेखका तल्लो डुगेश्वर, दुल्लु–कुशापानी डाडीमाडी–पीपलकोट हुँदै खुलालु मान्म, माथिल्लो–डुगेश्वर, दुल्लु, कुशापानी, कालीकोटको भर्ता हुँदै नाग्म र दैलेख सदरमुकामबाट महाबु, चिल्खाय, नाग्म हुँदै जुम्ला जोड्ने सडक निर्माण गरिएका हुन् । कालीकोट महावै गाउँपालिकाका अध्यक्ष नन्दबहादुर सिंहका अनुसार दैलेखबाट निर्माण गरिएका तीनवटा सडक कालीकोट र जुम्लाको सिमाना नाग्मसम्म जोडिने छ । दैलेखका तीन ठाउँबाट कालीकोट जोड्ने सडक निर्माण भएका छन् । दैलेखतर्फको सडकखण्ड निर्माण भइसकको छ । कालीकोटतर्फको सडकखण्ड निर्माण हुन बाँकी छ । तीन ठाउँबाट सडक निर्माण भए सुर्खेतबाट कालीकोट र जुम्लाको सडक दूरी, बाटो छोटो हुने उहाँले जानकारी दिनुभएको छ । सुर्खेतबाट कर्णाली राजमार्ग हुँदै कालीकोटको नाग्म पुग्न २०० किलोमिटर र दैलेखका तीन स्थानबाट कालीकोट सडक जोडिएमा ६० किलोमिटर छोटो दूरी हुने काली शुभकालिका गाउँपालिकाका अध्यक्ष खडानन्द चौलागाईंले बताउनु भएको छ । अहिले यी तीनवटै सडकमा काम चलिरहेको, कतिपय स्थानमा ग्राभेल, नाली र कालोपत्रको काम भइरहेको र केही ठाउँमा ठूला भिरमा चट्टान फोड्ने काम पनि जारी रहेको जानकारी उहाँले दिनु भएको छ । सङ्घीय सरकार र प्रदेश सरकारले प्राथमिकतामा राख्न सकेका छैनन् । कालीकोटे महावै गाउँपालिकाका अध्यक्ष सिंहले दैलेखको सदरमुकाम हुँदै कालीकोटको महावै गाउँपालिका जोड्ने सडकको ११ किलोमिटरमा कडा चट्टान भेटिएको तथा कालीकोटको भैँसेगौडादेखि चिल्खाय हुँदै नाग्मसम्म आठ किलोमिटरमा चट्टान रहेकोे बताउनु भएको छ । “यी चट्टान फोड्न सके सडक निर्माणको काम सहज हुनेछ”, उहाँले भन्नुभयो, “यस सडकको कालीकोटको भैँसेगौडाको तिला नदीमा पुल निर्माण भइरहेको छ । पुल निर्माण भए यो सडक सञ्चालनमा आउने छ तर स्तरोन्नतिको काम गर्न जरुरी रहेको छ ।” कालीकोट शुभकालिकाका अध्यक्ष चौलागाईंका अनुसार कालीकोटमा दैलेखका तीन ठाउँबाट सडक निर्माण भएमा आर्थिक वृद्धि र रोजगारीमा टेवा पुग्ने छ । अहिले सेरी पान्तडीको सडक निर्माण भइरहेको छ । दैलेखबाट कालीकोट जोडिने सडक यसैमा जोडिने, यी सडक निर्माण भए कालीकोटको आर्थिक विकास, रोजगारी, व्यापारलगायतका सम्भावना बढेर जाने उहाँले जानकारी दिनु भएको छ ।