भदौ २२, काठमाडौं । प्रहरीले विभिन्न सामानसहित दुईवटा ट्रक वीरगञ्जबाट नियन्त्रणमा लिएको छ । प्रहरीले सोमबार राति साढे ११ बजे वीरगञ्ज महानगरपालिका–१४ स्थित गण्डक सडकखण्डको बाटोबाट ना ३ ख ५१६५ र ना ३ ख ५५२५ नम्बरको मालबाहक ट्रक नियन्त्रणमा लिएको हो । पुरानो मितिको प्रज्ञापन पत्रका साथ उल्लेखित मालवस्तुको सट्टा भन्सार छली चोरी पैठारी गरी ल्याएको लत्ताकपडालगायत अन्य मालवस्तु लोड गरी चितवन लैजाँदै गरेको सूचनाको आधारमा ती ट्रक जिल्ला प्रहरी कार्यालय पर्साले नियन्त्रणमा लिएको हो । ट्रक रोकेर जाँच गर्ने क्रममा चालकहरु भागेकाले थप शंका उत्पन्न भएको प्रहरीको भनाइ छ । गाडीमा भएको प्रज्ञापन पत्र नं. ३ ख ५१६५ मा २०७७ माघ २२ गते र नं. ३ ख ५५२५ मा २०७८ साउन २१ गते लगायतका मितिको प्रज्ञापन पत्र भेटिएको थियो । बिल बिजकमा हाल सालैको मिति उल्लेख भएकाले गाडीमा सामानहरु प्रज्ञापन पत्र बमोजिम नरहेको हुन सक्ने भएकाले ट्रकलाई नियन्त्रणमा लिएको प्रहरीको भनाइ छ । ट्रक र समानको मूल्य ८० लाख रुपैयाँ मूल्यांकन गरी आवश्यक कारबाहीको लागि राजश्व अनुसन्धान कार्यालय पथलैया, बारामा बुझाइएको जिल्ला प्रहरी कार्यालय पर्साका प्रहरी उपरीक्षक बेलबहादुर पाण्डेले बताएका छन् ।