असोज ३, काठमाडौं । शारीरिक रुपमा अशक्त एक महिला र उनका श्रीमानलाई जिल्ला प्रशासन कार्यालय सप्तरीले घरमै गएर नागरिकता प्रमाणपत्रको प्रतिलिपि प्रदान गरेको छ । सप्तरीको रुपनी गाउँपालिका–५ बसविट्टीकी ७० वर्षीया श्रीमती दसनीदेवी खत्वे र उनका श्रीमान् ७४ वर्षीय मुसहरु खत्वेलाई प्रमुख जिल्ला अधिकारी जनार्दन गौतमले आइतबार संविधान दिवसका दिन घरमा पुगेर नेपाली नागरिकता प्रमाणपत्रको प्रतिलिपि दिएका हुन् । प्रजिअ गौतमको टोलीमा सहायक प्रमुख जिल्ला अधिकारी नाथु साह र प्रशासकीय अधिकृत कल्पना मानन्धर पनि सहभागी थिए । दम र पक्षघातबाट पीडित दसनी हिँडडुल गर्न नसक्ने भएकाले आफूले घरमै पुगेर नागरिकताको प्रतिलिपि प्रदान गरेको प्रजिअ गौतमले बताएका छन् । अपाङ्गता भएकी र बिरामी ज्येष्ठ नागरिकलाई घरमै सीडीओले आएर नागरिकता प्रदान गरेकोमा खुशी लागेको उनकी बुहारी तारादेवीले बताइन् । मुसहरुले २०३९ माघ २१ गते ३५ वर्षको हुँदा नागरिकता लिएका थिए । उनकी श्रीमती दसनीले २०३९ माघ २५ गते ३१ वर्षको हुँदा नागरिकता लिएकी थिइन् । तत्कालीन जिल्ला प्रशासन कार्यालयका कर्मचारीको लापरबाहीले दुवै जनाको नागरिकता नम्बर एउटै भएकाले राष्ट्रिय वाणिज्य बैंकले कारोबार गर्न असमर्थता जनाएपछि उनीहरुलाई समस्या परेको थियो । सामाजिक सुरक्षा भत्ताबाट घर चलिरहेको बताएकी तारादेवीले बैंकले पैसा दिन अस्वीकार गरेपछि रुँदै कराउँदै जिल्ला प्रशासन कार्यालय धाइरहेको बताइन् । नागरिकता नम्बरका कारण बैंकको खाता नम्बरमा समेत समस्या आएपछि मलेसियाबाट आउने पैसासमेत रोकिएको उनको भनाइ छ । अहिले नागरिकताको प्रतिलिपिमा नम्बर फरक पारेपछि मलेसियामा मृत्यु भएका छोरा कार्यरत कम्पनीबाट बीमाबापत पाउने सात लाख रुपैयाँ आउने बाटो खुलेको तारादेवीले बताइन् ।