कमल थापाद्वारा आफू राप्रपाबाट अलग भएको घोषणा
राष्ट्रिय प्रजातन्त्र पार्टीका पूर्व अध्यक्ष कमल थापाले पार्टी छाडेको घोषणा गरेका छन् । गृहजिल्ला मकवानपुर पुगेर पत्रकार सम्मेलनमार्फत् थापाले राप्रपाबाट आफू अलग भएको घोषणा गरेका हुन् ।
थापाले प्रेस विज्ञप्ति जारी गर्दै राप्रपाबाट अलग भएको घोषणा गरेका हुन् । उनले भनेका छन्,‘अत्यन्त भारी मन तथा पीडाबोधका साथ राष्ट्रिय प्रजातन्त्र पार्टीबाट अलग हुने निर्णय लिएको छु ।’ उनले विज्ञप्तिमा नयाँ पार्टी खोल्नेबारे चाहिँ केही खुलाएका छैनन् ।
थापाले विगतमा पवित्र ग्रन्थ गीता छोएर राप्रपा कहिले नफुटाउने कसम खाएका थिए । तर, राप्रपाको अध्यक्ष पदमा आफू पराजित भएपछि उनले पार्टीबाट अलग भएको घोषणा गरेका छन् ।
उनले विज्ञप्तिमा लेखेका छन्, ‘अत्यन्त भारी मन तथा पीडाबोधका साथ मैले राष्ट्रिय प्रजातन्त्र पार्टीबाट अलग हुने निर्णय गरेको छु। पार्टीभित्र देखा पर्न थालेको सैद्धान्तिक विचलन तथा गलत प्रवृत्तिलाई सुधार गरेर मेरो बाँकी क्रियाशील राजनीतिक जीवन पार्टी भित्रै बिताउने र पार्टीमै रमाउने उत्कट चाहना भएता पनि आफ्नो कुराको सुनुवाइ नहुने भएपछि मैले यो अप्रिय निर्णय लिन बाध्य भएको हुँ ।’ आफू राप्रपामा रहुन्जेल पार्टीका साथी सहयोगी र शुभचिन्तकबाट प्राप्त सहयोग, सद्भाव र स्नेहप्रति आफू सदैव आभारी रहने उनले विज्ञप्तिमा उल्लेख गरेका छन्। राप्रपाका कुनै साथीहरूसँग आफ्नो वैरभाव नरहेको बताउँदै उनले सबैको भलो होस् भन्ने कामना गरेका छन्।