फागनु १२, काठमाडौं । प्रतिनिधिसभाको आज बस्ने बैठकको कार्यसूचिमा अमेरिकी सहयोग सम्झौता एमसीसीमाथि सामान्य छलफल गरियोस भन्ने प्रस्ताव अर्थमन्त्री जनार्दन शर्माले राख्ने उल्लेख छ । संसद सचिवालयको सम्भावित कार्यसूचीको एक नम्बरमा कानुन, न्याय तथा संसदीय मामिला मन्त्री दिलेन्द्र बडुले महान्यायाधिवक्ताको वार्षिक प्रतिवेदन पेस गर्ने र दोस्रोमा अर्थमन्त्री शर्माले एमसीसी सम्झौतामाथि छलफलको प्रस्ताव राख्ने उल्लेख छ । तर, अर्थमन्त्री शर्मा भने राजधानी बाहिर हुनुहुन्छ । पर्वतमा आज हुने उद्योग वाणिज्य संघको कार्यक्रममा सहभागी हुन अर्थमन्त्री शर्मा बुधबार नै कुश्मा पुग्नुभएको हो । बुधबार फर्कने टिकट समेत रद्द गरेर अर्थमन्त्री कुश्मामा बस्नुभएको हो । आज दिउँसो १ बजे बस्ने संसद बैठकमा अर्थमन्त्री शर्मा उपस्थित हुने सम्भावना क्षीण रहेको बुझिएको छ । एमसीसीका बारेमा उठ्ने प्रश्नहरुको जवाफ दिनुपर्ने भएकाले त्यसलाई छल्न अर्थमन्त्री राजधानी बाहिर गएको अनुमान गरिएको छ । यही फागुन ८ गते पनि अर्थमन्त्री शर्मा संसद बैठकमा अनुपस्थित भएपछि सञ्चारमन्त्री ज्ञानेन्द्रबहादुर कार्कीले एमसीसी प्रस्ताव टेबल गर्नुभएको थियो । जनताले सर्वाधिक चासो राखेको विषयमा जवाफ दिनुपर्ने विभागीय मन्त्रीले वैठक छल्नु चाहीँ कति शोभनीय हो भन्ने प्रश्न उठेको छ ।