चैत ४, हुम्ला । हुम्लाको एक गाउँपालिकामा चुनावअघि नै वडा अध्यक्षसहित सदस्यहरु चुनिएका छन् । जिल्लाको नाम्खा गाउँपालिका–६ लिमीमा स्थानीयले स्थानीय तहको चुनावअघि नै जनप्रतिनिधि चुनेका हुन् । वडाध्यक्ष र सदस्य चुनेका उक्त गाउँपालिकाको ६ नम्बर वडाबासीले अब आगामी वैशाख ३० गते हुने चुनावमा गाउँपालिका अध्यक्ष र उपाध्यक्ष चुन्न मात्रै मतदान गर्दैछन् । जिल्लाको उत्तरी नाम्खा गाउँपालिका–६ लिमीबासीले गएको मंसिर ३० गते नै बैठक बसेर नयाँ जनप्रतिनिधि छानेका हुन् । नाम्खा गाउँपालिकाका उपाध्यक्ष पेमा तामाङले भने, ‘लिमीबासीले छुट्टै नीति–नियम बनाएको छ । यो नयाँ कुरा हुँदै होइन । यसअघि पनि यसरी नै चुन्दै आएका हौँ ।’ आफ्नो गाउँठाउँका लागि स्थानीयबासीले आफैँले जनप्रतिनिधि चयन गर्दै आएका उनले बताए । यो चलन उहिल्यैदेखि चल्दै आएको बताउँदै उनले भने, ‘लिमीबासी महत्वपूर्ण निर्णय गर्नुपरे कात्तिकको अन्तिम र मंसिरको पहिलो साता बैठक बस्दै आएका छन् ।’ उनका अनुसार सोही परम्परा अनुरुप गत मंसिर ३० गतेको बैठकले वडाध्यक्ष र सदस्यहरूको टुंगो लगाएको हो । उक्त बैठकले ६ नम्बर वडाको अध्यक्षमा फेरि पनि पाल्जोर तामाङलाई नै सर्वसम्मत गर्यो भने वडा सदस्यहरू चाहिँ सबै नयाँ छान्यो । पुनः वडा अध्यक्षको जिम्मेवारी पाएका तामाङ गाउँमा खाद्य संकट निम्तिएकाबेला गुहार माग्दै गत मंसिरमा सिंहदरबार काठमाडौं गएका थिए । पाँच दिने पैदल हिँडाइ र एक दिनको हवाई यात्रा पार गरेर मंसिर ७ गते काठमाडौं पुगेका उनको पहलकदमीबाट गाउँले चामल पाएको थियो ।