६ चैत्र, काठमाडौँ । रौतहट, उखुको रकम भुक्तानीमा ढिलाइ हुने, विभिन्न किसिमका प्राकृतिक एवं जैविक प्रकोपका कारण उखु खेतिमा समस्या हुने गरेकाले र राज्यबाट पनि किसानका लागि आवश्यक सहयोग नपाएपछि पछिल्लो समय किसानहरु उखु खेती गर्न छोडेसँगै यस वर्ष उखु उत्पादन झण्डै आधा नै घटेको छ । रौतहटको मध्यभागमा रहेको श्रीराम सुगर मिल्स गत वर्षदेखि बन्द छ र अर्को कटहरिया नगरपालिकामा रहेको बाबा बैजुनाथ चिनी मिल सञ्चालनमा रहेपनि उखु उत्पादन घटेको कारण मिलको लक्ष्य पूरा हुन सकेको छैन । २० लाख क्विन्टल उखु क्रसिङ गर्ने लक्ष्य लिएको बैजुनाथ चिनी मिलले यस वर्ष जम्मा छ लाख क्विन्टलको हाराहारीमा क्रसिङ गरेको मिलका सञ्चालक बैजुबाबराले बताउनुभयो । उखु अभावका कारण मिल सिजन अवधिभर नचलेपछि घाटा बेहोर्नुपरेको उहाँको गुनासो छ । जिल्लामा बर्सेनि ११÷१२ हजार बिघामा उखु उत्पादन हुँदै आएको जानकारी दिनुहुँदै उखु उत्पादक सङ्घ रौतहटका सचिव सफिन्द्र यादवले यस वर्ष पाँच÷छ हजार बिघामा मात्र उखु खेती भएको बताउनुभयो । उहाँ भन्नुहुन्छ, “विगतका वर्षको तुलनामा यस वर्ष आधा नै घटेको छ तर बैजुनाथ चिनी मिलको प्रभावकारी भुक्तानी पक्ष एवं उखु उत्पादनतर्फ किसानलाई अग्रसर गराउन गरेको गतिविधिले भने आउँदो वर्षमा उत्पादन बढ्ने पक्का छ । ”