१४ चैत्र, काठमाडौँ । पर्सा, यतिबेला विभिन्न स्थानहरुमा चैते धानको रोपाई सुरु भएको छ । चैतको पहिलो हप्ता देखि जिल्लामा चैते धान रोप्न सुरु गरिएको हो । सिञ्चित क्षेत्र बढेपछि पर्साको ग्रामीण क्षेत्रमा यसवर्ष चैते धानको खेती बढेको हो । छोटो समयमा राम्रो उत्पादन हुने भएकोले पनि सिञ्चाईको सुविधा भएको स्थानमा किसानहरु चैते धान तिर आकर्षित भएका छन् । कृषि कार्यालयले यसवर्ष पनि विभिन्न सहकारी मार्फत ठूला सिंचाई योजना अन्तर्गत सिंचाई योजना वितरण गरेको छ । चैते धान लगाइने पर्साका आधाजसो खेतमा रोपाई भइसकेको छ । चैते धानको बीउ छनौंट गर्दा उन्नत जातको र स्रोत खुलेको स्थानबाट बीउ ल्याउनुपर्ने बिज्ञको भनाई छ । जिल्ला कृषि बिकास कार्यालय पर्साका अनुसार गुणस्तरीय र उन्नत जातको बीउ छनौट गर्न सकेमात्र उत्पादन १५ देखि २० प्रतिशत वृद्धि गर्न सकिन्छ । स्थानीय कृषकहरूको अनुसार छिटो पाक्ने र वर्षा सुरु नहुदै फल दिने बीउको छनौट गर्नुपर्छ । विशेषगरी हर्दीनाथ १ जातको धानको बीउ चैतमा लगाउने किसनाको रोजाईमा पर्छ । ब्याड राख्दा हिलो बीउ भन्दा धुलो बीउको ब्याड राख्दा राम्रो हुने जिराभवानी गाउपालिका वार्ड नम्बर १ जगतियाका कृषक रामेश्वर खवासले बताउनु भयो । उनका अनुसार ब्याड प्लाष्टिकले छोपेको बीउ राम्ररी उम्रने हुनाले धानको उत्पादनमा वृद्धि ल्याउ सकिने बताउनु हुन्छ ।तर स्थानीयतह भएपनी कृषकहरुलाई गाउँपालिका बाट केही सेवा प्रदान नपाएको उनले गुनासो गरे पर्सामा चैते धानको बीउ नपाउँदा पर्साका ग्रामीण क्षेत्रका किसानहरु चितवनको भरतपुर माडी बाट धानको बिउ ल्याउन बाध्य हुन्छ । पर्साका ग्रामीण क्षेत्रको उत्तरी भेगको बढ्नियार, मानवा, सथवल, रंगपुर, पटेर्वासुगौली, शंकरसरैया, हरैया, महादेवपट्टी, सुबर्णपुर, ठोरी, लगाएतका स्थानमा चैते धान धेरै मात्रामा लगाउने गरिन्छ । मौसमि सिंचाईले मात्रै चैते धानलाई नपुग्ने र जिल्लाको दक्षिण क्षेत्रमा सिंचाई कम हुनाले उतरी क्षेत्रमा बोरिङ सिचाईको भरमा पनी चैते धान लगाउने गरिएको हो । जिल्ला कृषि बिकास कार्यालय पर्साका अनुसार यस वर्ष जिल्लामा २ हजार हेक्टर क्षेत्रफलमा चैते धान रोपाई हुदैछ । जसबाट करिब साँढे ३ मेट्रिक टन धान उत्पादन हुने अनुमान गरिएको छ । गत वर्ष जिल्लामा ४ हजार हेक्टर क्षेत्रफलमा चैते धान रोपाई भएको थियो भने ४५ सय मेट्रिक टन धान उत्पादन भएको थियो ।