धर्म निरपेक्ष घोषणा गर्नु र यसलाई समर्थन गर्नेहरू समेत देशका कलङ्क हुन ; शंकराचार्य
६ बैशाख, काठमाडौँ ।
भारतको जगन्नाथ पुरीको गोवर्धन मठका पीठाधीश श्रीमज्जगदगुरु शंकराचार्य स्वामी श्री निश्चलानन्द सरस्वतीले नेपालमा हिन्दु धर्म सनातनकालदेखि चल्दै आएको सनातनी परम्परालाई तोडी त्यसलाई राजनीतिक मुद्दा बनाएर धर्म निरपेक्ष घोषणा गर्नु कलङ्क हो र यसलाई समर्थन गर्नेहरू समेत देशका कलङ्क भएको बताउनु भयो ।
सोमबार विराटनगरमा आयोजित धर्म सभामा सहभागीहरूले राखेको प्रश्नको जवाफ दिंदै उनले संसारमा कुनै पनि कुरो निरपेक्ष छैन पानी, वायु, आकाश, अग्नि पनि निरपेक्ष नरहेको बताए ।
नेपाललाई धर्म निरपेक्ष राष्ट्र घोषणा गरिएको सन्दर्भमा राखिएको प्रश्नसँगै अबको बाटो के लिनु पर्ने भन्ने जिज्ञाशा शंकराचार्य समक्ष राखिएको थियो । अब के गर्ने भन्ने विषयमा नेपाली जनताले नै निर्णय गर्नु पर्ने हुँदा आफूले केही नबोल्ने उनको भनाई थियो ।
सो सभामा जातीय परम्परा र छुवाछूतको विषयमा पनि शंकराचार्य समक्ष जिज्ञाशा राखिएकोमा जातीय परम्परा सनातन धर्मकै एक अंगको रूपमा रहेको स्पष्ट पार्दै आधुनिक समाजमा एउटा जातिले अर्को जातिको व्यवसाय अ“गाल्दै आएको वंश परम्परा अनुसार कुनै पनि जातिको पहिचान नरहेको बताए ।
सो अवसरमा विराटनगरवासीका तर्फबाट विराटनगर महानगरपालिका र शंकराचार्य स्वागत समितिका तर्फबाट छुट्टाछुट्टै अभिनन्दन गरिएको थियो । महानगरपालिकाका तर्फबाट भीम पराजुली र स्वागत समितिका तर्फबाट सुरेशकुमार शर्माले शंकराचार्यको अभिनन्दन गरेका थिए ।