असार १०, काठमाडौं । नेकपा एकीकृत समाजवादीका १० जना सांसदले मन्त्री हेरफेरको विषयलाई लिएर अध्यक्ष माधवकुमार नेपाललाई ध्यानाकर्षण गराएका छन् । हाल सरकारमा रहेका ४ मन्त्रीसहित १० सांसदले मोर्चाबन्दी गरेर अध्यक्ष नेपाललाई ध्यानाकर्षण पत्र पठाउँदै मन्त्रिमण्डल पुनर्गठन गर्ने कुरा स्वाभाविक मान्न नसकिने बताएका छन् । आफूहरुलाई पटक–पटक अपराधीलाई जस्तो व्यवहार गरिएको भन्दै उनीहरुले असन्तुष्टि समेत जनाएका हुन् । आठ बुँदे ध्यानाकर्षण पत्रमा मन्त्रीहरु विरोध खतिवडा, रामकुमारी झाँक्री, प्रेम आले, कृष्ण कुमार श्रेष्ठ र ६ जना सांसदको हस्ताक्षर रहेको छ । अध्यक्ष नेपालले यसअघि अहिलेका मन्त्रीहरुलाई फिर्ता बोलाएर नयाँलाई मन्त्री बनाउने पार्टीबाट निर्णय गरी प्रधानमन्त्री शेरबहादुर देउवालाई नाम सिफारिस गरेका थिए । तर, बजेट अधिवेशन चलिरहेको र मन्त्रीहरुले जवाफ दिनुपर्ने भन्दै तत्कालका लागि मन्त्री हेरफेरको गृहकार्य स्थगित गरिएको थियो । मन्त्री हेरफेर गर्ने पार्टीको निर्णणबाट असन्तुष्ट बनेकाहरुले बुझाएको ध्यानाकर्षण पत्रमा लेखिएको छ, ‘बजेट पास भएपछि गठबन्धनमा रहेका दलहरुसँग सल्लाह गरेर पार्टीको निर्णय कार्यान्वयन गर्ने भनेर दिएको निष्कर्ष विपरीत पटक–पटक आजै÷भोलि मन्त्रीहरुलाई सपथ गराउन प्रधानमन्त्रीलाई दिएको दबाब किमार्थ राम्रो मान्न सकिन्न ।’ उनीहरुले मन्त्रिमण्डल पुर्नगठन गर्दा पुरानो टिम पूरै फिर्ता र नयाँ टिम सन्तुलित र समावेशी हुनुपर्ने माग गरेका छन् ।