१३ साउन, काठमाडौँ । केही दिनदेखिको वर्षापछि खसेको पहिरोले पर्वतको कुश्मा नगरपालिका–१० पिपलटारीका चार घरपरिवार पूर्ण रुपमा विस्थापित भएका छन् । पहिरोका कारण करिब ६० परिवार रहेको बस्ती जोखिममा परेको हो । पिपलटारीको सिमखेतस्थित बस्तीमाथिको फाँटबाट पहिरो खसेपछि आसपासका बासीन्दा समेत त्रसित भएका छन् । करिब २ सय मिटरमाथिबाट बग्न सुरु गरेको पहिरो बस्तीसम्मै आइपुगेपछि चार घरपरिवारले घरै छाडेका वडा अध्यक्ष रामचन्द्र सुवेदीले जानकारी दिनुभयो । स्थानीय कृष्ण सुवेदी, होमनाथ शर्मा, जगत सुवेदी र रघुनाथ सुवेदीका परिवार पहिरोले पुरिने डरले घर छोडेर छिमेकीकोमा शरण लिइरहेका छन् । त्यस्तै आपसापका ६४ परिवार रहेको बस्ती पहिरोको प्रत्यक्ष जोखिममा परेको छ । पहिरोका कारण गाउँमा विद्युतका पोलसमेत ढल्न थालेपछि स्थानीयले विद्युत प्राधिकरणको कुश्मा वितरण केन्द्रलाई जानकारी गराएका छन् । उहाँले भन्नुभयो, ‘पहिरो खसेको स्थानमा ३ वटा पोल जोखिममा छन् । एउटा पहिरोले बगाएर तल खसालेको छ। ‘बाँकी दुईवटा हटाउनुपर्ने छ ।’ गत वर्ष जस्तो ठूलो वर्षा नभएपनि जोखिमयुक्त बस्तीका नागरिकलाई आवश्यक सतर्कता अपनाउन आग्रह गरिएको प्रमुख जिल्ला अधिकारी नारायणप्रसाद सापकोटाले जानकारी दिनुभएको छ ।