भाद्र ६, काठमाडौँ । मोरङमा सशस्त्र प्रहरीले पेस्तोलसहित २ जनालाई पक्राउ गरेको छ । जिल्लाको सुनवर्षी नगरपालिका ८ खरेवारी सीमा इलाकाबाट आइतबार खटिएको सशस्त्र प्रहरीको टोलीले दुईवटा पेस्तोलसहित २ जनालाई पक्राउ गरेको हो । पक्राउ पर्नेमा सोही ठाउँ बस्ने २८ वर्षिय आरिफ आलम र उर्लाबारी नगरपालिका ६ बस्ने २९ वर्षीय नवीन धिमाल रहेका छन् । को २७ प ४०६ नम्बरको मोटरसाईकलमा भारतबाट नेपालतर्फ आउँदै गरेका आलमलाई सशस्त्र प्रहरी बल नेपाल बिओपी सिक्टीले एउटा अटोमेटिक चाइनिज पेस्तोल, सोको एउटा म्यागाजिन तथा एक राउण्ड गोली र एउटा सिक्सर पेस्तोलसहित पक्राउ गरेको हो । आलमले उक्त पेस्तोल सोही जिल्लाको उर्लाबारी नगरपालिका ६ बस्ने २९ वर्षिय नविन धिमालले मगाएको भनि दिएको मौखिक बयान दिएका थिए । सोही बयानका आधारमा धिमाललाई पनि जिल्लाको रतुवामाई नगरपालिका ८ दाम्राभिट्टाबाट पक्राउ गरिएको प्रहरीले जनाएको छ । धिमालले प्रयोग गरेको को २२ प ६७०७ नम्बरको मोटरसाइकल तथा ४७ हजार ७ सय ७० नेपाली रुपैयाँ र दुई थान मोबाइल सेट समेत बरामद भएको प्रहरीको भनाई छ । पक्राउ परेका दुवै जनालाई बरामद पेस्तोल, म्यागाजिन, गोली, मोटरसाइकल, रुपैयाँ र मोबाइलसहित नेपाल प्रहरीमा बुझाइएको सशस्त्र प्रहरीले जानकारी दिएको छ । यसैगरी सशस्त्र प्रहरी बल नेपाल बिओपी बनैनियाले भाद्र ५ गते सप्तरीको राजगढ नगरपालिका २ बनैनिया सीमा इलाकाबाट एउटा कटुवा पेस्तोल तथा सोको एउटा गोली बरामद गरेको छ ।